له درې میاشتیني ځنډ وروسته کورمې ولسوالۍ ته په خوراکي توکو بار لارۍ ورسېدې

له پاړه چناره ځایي خبریالانو افغانستان انټرنشنل ته ویلي چې په خوراکي توکو بار ۳۵ لارۍ پرون ناوخته د کورمې ولسوالۍ ته رسیدلې دي.

دغه خبریالان وایي په دغو لاریو کې د چرګانو په ګډون نور اړین خوراکي توکي بار و، چې د زیانمنو شویو سیمو په خلکو د ورکړل شویو کارټونو له مخې وویشل شول.
د دغو توکو د تر لاسه کولو لپاره اوږده کتارونه جوړ شوي و او هر کس هڅه کوله چې د خپلې اړتیا وړ توکي تر لاسه کړي.
د دغو توکو لس لارۍ د باغوان سیمې په زیانمنو شویو خلکو ویشل شوي دي.
دا رنګه په بره کورمه کې د توري منګل، مقبلو، او بوشهرې په یو شمېر کلیو کې هم پر خلکو دغه توکي ویشل شوي دي.
په کورمې ولسوالۍ کې سوداګر وایي چې د شاوخوا ۴۰۰ زره خلکو لپاره په ۲۵ لاریو بار خوراکي توکي بسنه نه کوي. دوی وایي د دغو خلکو د اړتیاو د پوره کولو لپاره لږ تر لږه په ۵۰۰ لاریو کې بار خوراکي توکو ته اړتیا لیدل کیږي.
د دغو سوداګرو په وینا دمګړۍ په سیمه کې د خوراکي توکو تر څنګ خلک د دارو درملو او سون توکو له سخت کمي سره مخامخ دي، د تیلو په پمپ سټیشنونو کې تیل نه موندل کیږي چې دې کار د خلکو په لیږد رالیږد کې هم ستونزې زیاتې کړې دي.
د کورمې اوسیدونکي له چارواکو غوښتنه کوي چې دغې ولسوالۍ ته دې د ټولو غځیدلو لارو په خلاصولو کې ګام واخلي او د خلکو د ډاډمن تګ راتګ لپاره دې زمینه برابره کړي.
دوی له چارواکو دا غوښتنه هم کوي چې په کوهاټ کې د شوې جرګې پرېکړې دې پلې شي.
د شاوخوا ۱۰۰ ورځو را په دې خوا کورمې ولسوالۍ ته د نا امنۍ او تاوتریخوالي له امله ټولې لارې بندې شوې او خلکو ته یې درانه زیانونه اړولي دي.
داسې راپورونه هم شته چې په کورمه کې د خوراکي توکو تر څنګ په روغتونونو کې د دارو درملو د نشتوالي او کموالي له امله تر دې مهاله د ۱۴۷ ماشومانو په ګډون ۲۲۱ تنه مړه شوي دي.