یوه پاکستاني د افغان پاسپورټ په کارولو سره د ایرلنډ له حکومته ۴۸ زره ایرو ترلاسه کړي
د ایرلنډ مرکز ډوبلین کې یوه پاکستاني د جعلي افغان پاسپورټ په کارولو د دغه هېواد له حکومته ۴۸ زره ایرو په ناقانونه توګه ترلاسه کړي دي. دغه پېسې یې د ۱۲ کلونو په موده کې د وړیا حکومتي مرستو د پروګرام له لارې ترلاسه کړي دي.
ایرېش ټایمز د چهارشنبې په ورځ یو راپور خپور کړی، چې له مخې یې د ډوبلین محکمې تورن کس ته خبرتیا لېږلې خو هغه کوم ځواب نه دی ورکړی.
دغې محکمې ویلي، چې که تورن کس خپل جرم ومني او خپل پاسپورټ تسلیم کړي، ضمانت کې یې کومه ستونزه نه شته.
د تورن کس مدافع وکیل ایغان اوسلیوان پلټونکو ته د خپل پاکستانی پاسپورټ او د اوسېدو ځای ادرس ورکړی دی.
تورن کس فضل اکبر نومېږي او د پاکستاني پاسپورټ په لرلو واضیح ده، چې د پاکستان دی.
د عامه څارنوالۍ رییس وایي، که چیرې اکبر خپل جرم ومني قضیه به یې د ولسوالۍ په محکمه کې فیصله شي.
د اعتراف د نه کولو په صورت کې به هغه د قاضي او جوري هیت په وړاندې محاکمه شي، چې د سزا ورکولو پراخ واکونه لري او پروسه یې هم اوږده ده.
ډوبلین محکمې له اکبر څخه غوښتي، چې نه باید د سفر د اسنادو غوښتنه وکړي او یا هم خپل پاسپورت نوی کړي.
همدا راز دغې محکمې ورته خبرداری ورکړی، که چیرې خپل ادرس بدلوي نو باید اړوندو ادارو ته خبر ورکړي.
له اکبر څخه غوښتل شوي، چې راتلونکې میاشت کې بیا محکمې ته حاضر شي.
