طالبانو د «اخلاقي فساد او قمار وهنې» په تور ۹ کسان نيولي او یوه ښځه يې په دُرو وهلې
د طالبانو ستره محکمه په يوه خبرپاڼه کې وايي، چې د نورستان په وایګل ولسوالۍ کې يې يوه ښځه د زنا په تور په عام محضر کې ۳۹ دُرې وهلې ده. په ورته وخت کې په کابل کې د طالبانو امربالمعروف د «اخلاقي فساد او قمار وهنې» په تور د ۹ کسانو د نیولو خبر ورکړی.
د طالبانو سترې محکمې په يوه خبرپاڼه کې ویلي، چې د زنا په تور دې ښځې ته د محکمې له تاييد وروسته سزا ورکړل شوې.
طالبانو د دې ښځې د هویت په اړه مالومات نه دي ورکړي.
بل لوری په کابل کې د طالبانو امربالمعروف وزارت وايي، چې د ښار په درېيمه او پنځمه حوزه کې يې درې تنه د «اخلاقي فساد» او شپږ تنه يې د «قمار وهنې» په تور نيولي.
دغه وزارت د سه شنبې په ورځ ويلي، چې د «قمار وهنې» په تور نيول شوي کسان یې تر لنډ مهالي بند وروسته په ضمانت خوشي کړي.
طالبان وایي، له دې نیونو څخه یې موخه په ټولنه کې د «اسلامي او ټولنيزو ارزښتونو» ساتل او اصلاح کول دي.
طالبان نږدې هره ورځ په بېلابېلو ولایتونو کې په خپلسري ډول خلک په بېلابېلو تورونو نيسي، زنداني کوي يې او په عام محضر کې يې په دُرو وهي.
د بشري حقونو سازمانونه وايي، چې د طالبانو قضايي سیستم معیاري نه دی او تورن کسان د مدافع وکیل په ګډون قانوني لارو چارو ته لاسرسی نه لري.
