د امریکا د کانګرس غړی: بل ترهګریز برید به له طالبانو سره د مالي مرستو له لارې تمویل شي
د امریکا په کانګرس کې مقاومت جبهې ته نږدې استازي ټیم برچیټ په افغانستان کې د طالبانو تر واکمنۍ لاندې د ترهګرو ډلو له خوا د امریکا د مالي مرستو د استفادې په اړه خبرداری ورکړ.
هغه ادعا وکړه، چې «راتلونکی ترهګریز برید به د امریکایانو په پیسو ترسره شي.»
نوموړي دغه څرګندونې د سې شنبه په ورځ د ټرمپ د سلاکار اېلان ماسک د هغې پوښتنې په ځواب کې وکړې، چې ایا د امریکایي مالیه ورکوونکو پیسې د طالبانو لاس ته ځي؟
بورچټ پر اېکس پاڼې کاږلي: «هو، موږ دغه کار کوو. (په متحده ایالاتو کې) بل ترهګریز برید سل په سلو کې د امریکایی مالیه ورکوونکو له خوا تمویل کېږي.»
ټیم بورچټ د امریکا د استازو مجلس یو له هغو څو غړو څخه دی، چې د مقاومت له جبهې سره ښې اړیکې لري او د طالبانو په وړاندې د دغې ډلې د جګړې ملاتړ کوي.
ښاغلي بورچټ د مقاومت جبهې د مطرح کولو لپاره احمد مسعود او امرالله صالح ته بلنه ورکړې، چې امریکا ته سفر وکړي.
بورچټ تېره ورځ هم له ټرمپ څخه وغوښتل، چې له طالبانو سره د امریکا مالي مرستې بندې کړي.
د هغه په وينا، له افغانستان سره د واشنګټن مرستې طالبانو ته ځي.
د امریکا منتخب ولسمشر د سې شنبه په ورځ په یوه خبري کنفرانس کې وویل، چې امریکا طالبانو ته په ملیاردونو ډالر ورکوي او دا مساله ورته د منلو وړ نه ده.
ډونالډ ټرمپ ویلي، چې طالبانو ته باید مرستې و نه لېږل شي.
