ایلان ماسک د امریکا له خوا طالبانو ته د پیسو په استولو حیران شوی دی
د نړۍ تر ټولو شتمن کس او امریکایي میلیاردر د دغه هېواد د استازو جرګې د غړي د هغه لیک په اړه غبرګون ښودلی، چې د امریکا له راتلونکي حکومت څخه یې پر طالبانو د نغدي کڅوړو د بندیدو غوښتنه کړې.
ماسک په اېکس پاڼه کې دا لیک بیا خپور کړی او ورسره یې په حېرانۍ لیکلي: «ایا موږ په رښتیا د امریکا د مالیه ورکوونکو پیسې طالبانو ته استوو؟».
د امریکا د استازو د جرګې غړي ټیم بورجټ به خپل لیک کې له منتخب ولسمشر ډونالډ ټرمپ څخه غوښتي چې په «بېړنۍ توګه دې د امریکا د نغدي کڅوړ د بندیدو» امر وکړي. هغه ویلي چې امریکا باید د خپلو بهرنیو دوښمنانو مالي ملاتړ ونه کړي.
د افغانستان د بیا رغونې لپاره د امریکا ځانګړي مفتش راپور ورکړی، چې امریکا په تېرو درېیو کلونو کې د طالبانو تر واک لاندې افغانستان ته له درې میلیارده ډالرو څخه ډېرې نغدې کڅوړې استولي دي.
هم مهاله د افغانستان د پخواني جمهوري نظام لومړي مرستیال امر الله صالح هم نیوکه کوي چې د بایډن په مشرۍ د امریکا حکومت په بېلابېلو برخو کې د طالبانو مالي ملاتړ کړی او له همدې کبله د دغه ډلې اجرائیوي جوړښت لا پیاوړی شوی دی.
د امریکا په حکومت یو شمېر د څار بنسټونه هم نیوکه کوي چې د بایډن حکومت د بهرنیو چارو وزارت تر چتر لاندې افغانستان ته د دغو استول کیدونکو نغدي کڅوړو په تړاو هېڅ ډول څار نه شته او له همدې امله د افغانستان دننه یو شمېر طالبانو جعلي نادولتي موسسات جوړ کړي چې د امریکا دغه مرستې یې له همدغو لارو لاسونو ته لوېږي.
د امریکا د بهرنیو چارو وزارت بیا ویلي، دغه مرستې د بشري او خیرښېګڼې د پروګرامونو لپاره ځانګړې شوې دي او موخه یې د افغانستان عام خلک دي چې له قحطۍ، لوږې او د خوراکي موادو له کمښت سره مخ دي.
نیوکې دا دي چې د امریکا دغه مرستې په افغانستان کې د ترهګرۍ د پیاوړتیا سبب کیدلای شي او ژر تر ژره باید د طالبانو تر واک لاندې افغانستان ته د نغدي کڅوړو د لېږد بهیر په ټپه ودرول شي.
