مایکل مکال: داعش یو ځل بیا په افغانستان کې سر راښکاره کړی

د امریکا د استازو جرګې د بهرنیو اړیکو د کمېټې پخواني مشر مایکل مکال خبرداری ورکړی، چې د طالبانو تر واک لاندې افغانستان کې داعش بیا سر راښکاره کړی.

مکال وایي، د ټرمپ اداره چې ډېر ژر به خپل کار پیل کړي، باید د داعش خراسان مخ په زیاتېدونکی ګواښ جدي ونیسي او پر وړاندې یې اقدام وکړي.
مکال د دوشنبې په ورځ د ای بي سي ټلویزیون ته وویل، «یوه بله مسله چې زه یې په اړه ډېر اندېښمن یم د افغانستان سقوط او تراژیدي ده. موږ په افغانستان او پاکستان کې د داعش د خراسان څانګې د بیا راژوندي کېدو شاهدان یو. "دا واقعا ما اندېښمن کوي."
طالبان ادعا کوي، چې په افغانستان کې یې داعش له منځه وړی او د افغانستان خاوره د بهرنیو هېوادونو پر ضد نه کارول کېږي.
خو د نړۍوالو خپلواکو بنسټونو راپور ښيي، چې داعش په افغانستان کې د خپل نفوذ د پراخولو او په خپلو لیکو کې د خلکو جذبولو ته دوام ورکوي.
د ملګرو ملتونو د امنیت شورا د راپور پر بنسټ، داعش ان د طالبانو په امنیتي ادارو کې هم نفوذ کړی دی.
مکال په دې مرکه کې ویلي، چې په دې وروستیو کې له داعش سره تړلي اته کسان امریکا ته داخل شوي دي.
هغه د امریکا له منتخب ولسمشر ډونلډ ټرمپ څخه وغوښتل، چې له دوو اونیو څخه په کمه موده کې خپله دنده پیل کړي، تر څو له دوو سترو ګواښونو، د ترهګرو ډلو په ځانګړې توګه د داعش د رسنیو او انټرنیټي فعالیتونو مخه ونیسي.
مکال د امریکا په نیو اورلینز ښار کې د داعش د یوه ملاتړي وروستي برید ته په اشارې سره ټینګار وکړ، چې په دې کې شک نه شته چې ترهګري د دغه هیواد لپاره مخ پر زیاتېدونکی ګواښ دی.
د امریکا د استازو جرګې د بهرنیو اړیکو د کمېټې پخواني مشر هم ویلي، چې په نیو اورلینز کې پر موټر برید باید د بېدارۍ غږ وګڼل شي.
د هغه په وینا: «ځانمرګی برید یوه ساده طریقه ده او دا د اور وژنې ماشین په څېر کارول اسانه دي."
شمس الدین جبار امریکايي اتباع د نوي کال په مناسبت د نیو اورلینز په ښار کې د کرسمس په بازار کې د برید په پایله کې لږ تر لږه ۱۴ تنه ووژل.
اېف بي ای ویلي، چې هغه له داعش څخه الهام اخیستی و.
د بریدګر په موټر کې د داعش بیرغ هم موندل شوی.