ریچارډ بېنېټ له پاکستان نه وغوښتل چې افغانان په زور ونه شړي
د افغانستان لپاره د ملګرو ملتونو د بشري حقونو ځانګړي راپور ورکوونکي له پاکستان څخه د افغان کډوالو پر جبري اېستلو او زنداني کولو اندېښنه وښوده. ریچارډ بېنېټ پر پاکستان غږ وکړ، چې دا بهیر ودروي او د افغان کډوالو، په ځانګړې توګه د زیانمنو افغانانو حقونه خوندي کړي.
د افغانستان لپاره د ملګرو ملتونو د بشري حقونو ځانګړي راپور ورکوونکي پر خپل اېکس ولیکل چې د سیمې هېوادونه باید له زیانمنو افغانانو سره ښه چلند وکړي.
ریچارډ بینیټ لیکلي: « زه بیا خپل غږ پورته کوم د دې لپاره چې افغانان، په ځانګړې توګه هغه کسان چې زیانمنو کټګوریو پورې اړه لري، خوندي پاتې شي او جبري ونه شړل شي. په سیمه کې مېشت افغانان د غوره چلند مستحق دي».
نوموړي زیاته کړې، « زه له ټولو هېوادونو غوښتنه کوم چې د کوربه هېوادونو لپاره د تمویل کچه زیاته کړي او د کډوالو د ځای پر ځای کولو لارې چارې لا پیاوړې کړي».
په دې وروستیو کې پاکستان اعلان وکړ، چې په تېره یوه اونۍ کې یې ۱۸۳ بې اسناده افغان کډوال له دغه هېواده شړلي دي.
پاکستان له دغو کډوالو سره د ناوړه چلند راپورونه رد کړي، خو په دې وروستیو کې د دغه هېواد د پارلمان یوه پخواني غړي محسن داوړ ویلي، چې پاکستاني پولیس له افغان کډوالو سره "غیر انساني چلند" کوي.
