حقاني: د ځینو کسانو سخت دریځۍ، خلک له دینه زړه توري کړي دي

په یوه خپور شوي غږیز پیغام کې د طالبانو د کورنیو چارو وزیر سراج الدین حقاني د دیني زده‌کړو ترڅنګ د عصري زده‌کړو پر اهمیت ټینګار کړی دی.

هغه په ټولنه کې د ځینو کسانو افراطي چلند ته په نیوکې سره وایي، دغه سخت دریځي د دې لامل شوې چې خلک له دینه زړه توري شي.
نوموړي په دغه پیغام کې د کوم چا د نوم اخیستلو پرته ویلي:« له بده مرغه ځیني کسان په قصدي توګه له سخت دریځۍ او سخت چلند سره هڅه کوي، چې د دین او دیني مدرسو ډارونکی انځور خلکو ته وښیي.»
هغه وړاندې ټینګار کړی، چې دین او نړۍ له یو بل سره تړلي دي او عصري علوم او دیني زده‌کړې د یو بل بشپړونکي دي.»
هغه د خپلو خبرو په یوې برخه کې وایي:« د دغو دوو حوزو ترمنځ هیڅ ډول تضاد نه شته او دواړه د یوې متوازنې او پرمختللې ټولنې جوړولو لپاره اړینې دي.»
دغه څرګندوتې داسې مهال کېږي، چې په افغانستان کې د طالبانو ځیني سیاستونه په ځانګړې توګه د ښځو پر ټولنیزو چارو او زده کړو لګول شوي بندیزونه هم په کور دننه او هم بهر کې سختې نیوکې او غبرګونونه راوپارولي دي.
د طالب مشرانو ترمنځ شته اختلافونه د دغې ډلې دننه یو له لویو ننګونو څخه دي.
ویل کېږي، چې ډېر دغه اختلافونه د ایډیولوژیک، د هېواد د اداره کولو څرنګوالي، د قدرت او د سرچینو د وېش او د نړۍوالې ټولنې سره د تعامل په برخه کې رامنځته شوي دي.
د طالبانو ځینې مشران په ځانګړې توګه د سراج الدین حقاني اړونده ډله له نړۍ سره د تعامل چاره غوره ګڼي، په داسې حال کې چې ملا هبت الله ته نږدې ډله د اسلامي شریعت پر سختو سیاستونو او سختو تفسیرونو ټینګار کوي.