جرمني تېر کال ۱۳۶۱ تنه افغانان له خپلې خاورې شړلي
د جرمني د کورنیو چارو وزارت د معلوماتو له مخې دغه هېواد تېرکال ۱۳۶۱ تنه افغانان اخراج کړي، چې ۲۸ تنه یې په یوه چارټر الوتنه کې مستقیم کابل ته لېږدول شوي. د جرمني د کورنیو چارو وزیرې نانسي فیزر څرګنده کړې چې افغانستان ته به د «مجرمانو» د شړلو لړۍ جاري وساتي.
جرمني رسنۍ وايي، چې برلین په ۲۰۲۴ کال کې د ورته تېرکال د شمېرو په پرتله ډېر خلک اخراج کړي دي.
د دغه هېواد د کورنیو چارو وزارت ویاند ویلي چې له جنورۍ څخه د نومبر تر پایه پورې ۱۸ زره او ۴۰۰ کسان شړل شوي دي. دا د ۲۰۲۳ کال په پرتله شاوخوا ۱۲ سلنه زیاتوالی ښیي.
چارواکي وايي، چې ډېری اخراج جورجیا ته شوی، چې جرمنی یې د "خوندي اصلي هېواد" په توګه طبقه بندي کوي.
د جرمني د کورنیو چارو وزارت یوه ویاند ویلي چې د ۲۰۲۴ کال په لومړیو ۱۱ میاشتو کې ټولټال ۱۸ زره او ۳۸۴ کسان بیرته استول شوي دي. د بیلډ د رپوټ له مخې، په ۲۰۲۳ کال کې دا شمېر ۱۶ زره او ۴۳۰ تنه و.
په ۲۰۲۴ کال کې د اخراج اصلي ځای جورجیا وه، چې جرمني په ۲۰۲۳ کال کې د خوندي اصلي هېواد په توګه وټاکه.
په ۲۰۲۴ کال کې له جرمني څخه جورجیا ته له ۱۶ سوو زیات کسان شړل شوي دي.
هغه هېوادونه چې خوندي اصلي هېوادونه بلل کېږي، هغه ځایونه دي چې په عمومي توګه ګومان کېږي هلته د سیاسي تعقیب، غیر انساني چلند یا سپکاوي ویره نشته او له همدې امله د هغوی اوسېدونکو ته جدي خطر نه وي.
په تېر کال کې د شړل شویو کسانو په اصلي هېوادونو کې ترکیه په لومړي ځای کې ده. په ۲۰۲۴ کال کې ۱۷ سوه او ۲۰ ترکي وګړي له جرمني څخه شړل شوي دي.
د هغو بهرنیانو یوه برخه چې په ۲۰۲۴ کال کې شړل شوي، جرمني چارواکو د هغوی اصلي هېوادونو ته نه دي استولي، بلکې نورو اروپایي هېوادونو ته یې لېږلي دي چې د ډوبلین مقرراتو له مخې د هغوی د پناه غوښتنو مسوولیت لري. دا په ځانګړي ډول د سوریې او افغانستان د خلکو لپاره صدق کوي.
د جرمني د کورنیو چارو وزارت په وینا، له ۸۱۶ عراقي وګړو څخه چې په ۲۰۲۴ کال کې له جرمني شړل شوي، ۶۱۵ کسان په مستقیم ډول عراق ته استول شوي دي.
