امیرخان متقي د یو پلاوي په مشرۍ متحده عربي اماراتو ته په رسمي سفر ولاړ

طالبان وايي، د دې ډلې د بهرنیو چارو وزیر امیر خان متقي په مشرۍ یو پلاوی یې نن متحده عربي اماراتو ته په رسمي سفر روان شو. طالبانو په خپله خبرپاڼه کې ویلي، چې دې سفر کی به د دوی پلاوی له اماراتي چارواکو سره د دوو اړخیزو اړیکو پر پیاوړتیا او پر لېوالتیا وړ نورو مسلو خبرې وکړي.

د طالبانو د بهرنیو چارو وزارت ویاند حافظ ضیا احمد نن دوشنبې «د مرغومي ۱۷مه» په خپل اېکسپاڼه کې متحده عربي اماراتو ته د طالبانو د بهرنیو چارو وزیر امیر خان متقي د سفر خبر ورکړ.

حافظ ضیا احمد پ لیکلي:« په پام کې ده، چې د دې سفر پرمهال به افغان پلاوی اماراتي چارواکو سره پر دوو اړخيزو اړيکو، د اقتصادي همکاريو پر پراختيا او د دواړو خواوو د لېوالتيا وړ پر نورو موضوعاتو خبرې وکړي.»

طالبانو د دې سفر په اړه نور جزییات نه دي خپاره کړي او نه هم تر دې دمه د متحده عربي امارات چارواکو په دې هکله څه ویلي دی.

طالبانو په دې خبرپاڼه کې نه ده په ډاکه کړې چې دا سفر د چا په غوښتنه کېږې او په دې پلاوي کې د طالبانو نور کوم چارواکي شامل دي.

د طالبانو د بهرنیو چارو وزارت د متقي هغه انځورونه خپاره کړي دي، چې متحده عربي اماراتو ته د روانېدو وړاندې یې له خپلو مامورینو سره ناسته کړې ده.