د چین او پاکستان ترمنځ د خرو صادرات؛ دواړه هېوادونه د اقتصادي همکارۍ نوی دور پېلوي
پاکستان او چین تېر کال د یوه تړون په لاسلیک کولو سره د خرو د غوښې او پوستکي د صادراتو په برخه کې خپلې همکارۍ پراخې کړلې. پاکستان په سیمه کې چین ته د خرو لوی صادرونکی هیواد ګڼل کیږي.
د رسمي معلوماتو له مخې دغه تړون د پاکستان د خوړو خوندیتوب او څېړنو وزارت او د چین د ګمرکونو عمومي ادارې ترمنځ لاسلیک شوی، چې موخه یې په چین کې د دغه مخ پر ودې مارکېټ کې د صادراتو اسانول او ښه ګټه اخیستل دي.
په چین کې د پاکستان سفیر خلیل هاشمي د «روبه رو» په نامه د اج نیوز یوې خپرونې سره په مرکه کې یاد تړون د دواړو هېوادونو د سوداګریزو اړیکو د پراختیا لپاره یو مهم ګام وباله.
نوموړي وویل چې چین د خرو د صادراتو لپاره یو سټراتېژیک او لوی مارکېټ دی او پاکستان ته ځانګړې اقتصادي اهمیت لري.
هغه زیاته کړه چې د دواړو هېوادونو ترمنځ وروستی پروټوکول د پخوانیو خنډونو د له منځه وړلو لامل شوی او اوس پاکستان چمتو دی چې د چین اړتیاوې په دې برخه کې پوره کړي.
د رسمي شمېرو له مخې په پاکستان کې د ۲۰۲۳ کال تر پایه ۵.۶ میلونه خره درلودل او دغه شمېر هر کال مخ په لوړه روان دی.
چین چې شاوخوا ۵.۹ میلیونه خره لري، د خرو د غوښې او پوستکي د زیاتېدونکي اړتیا له امله د نورو هېوادونو وارداتو ته مخه کړې ده. د خرو پوستکی په چین کې په پراخه کچه د «ای جیاو» په نامه دودیزې درملنې لپاره کارول کېږي.
دغه درمل، چې د چینایي دودیز طب یوه برخه ده، د وینې د جریان د ستونزو، بېخوبۍ او وچ ټوخي د درملنې لپاره کارېږي. کارپوهان اټکل کوي چې د دې درملو اړتیاوې پوره کولو لپاره هر کال په ټوله نړۍ کې میلیونونه خره وژل کیږي.
پاکستان هڅه کوي له دې فرصت څخه په ګتې اخیستو خپل صادرات زیات کړي. د رسمي معلوماتو له مخې د دې لپاره، د «هینګینګ ګروپ» په نامه شرکت چمتو دی چې په ګوادر ازاده سیمه کې یو عصري قصابي جوړه کړي. دغه تاسیسات به په کال کې د ۲۱۶ زره خرو د اړتیا وړ غوښه د چین بازار ته برابره کړي.
په چین کې د پاکستان سفیر ټینګار وکړ چې له چین سره په بېلابېلو برخو، په ځانګړي ډول د خرو د صادراتو په برخه کې د سوداګریزو اړیکو پیاوړي کول، د پاکستان د پراخې اقتصادي ستراتیژۍ یوه برخه ده.
خېبر پښتونخواه یو له هغو ایالتونو ګڼل کېږي چې د غرنیو سیمو د درلودو له کبله په کې په لوی شمېر خره موجود دي او ۲۰۱۷ زیږدیز کال کې ایالتي حکومت پلان درلود چې چین ته نږدې ۸۰ زره خره صادر کړي.
