یونېسف: ۲۰۲۴ د جګړه ځپلو ماشومانو لپاره خورا خطرناک کال و
د ملګرو ملتونو د ماشومانو د ملاتړ صندوق په خپل وروستي راپور کې ویلي، چې ۲۰۲۴ کال هغو ماشومانو ته یو له خورا بدو کلونو و، چې د جګړو په سیمو کې ژوند کوي. راپور ښيي چې دا مهال د نړۍ شاوخوا شپږمه برخه ماشومان په هغو سیمو کې ژوند کوي چې د وسلهوالو شخړو تر اغېز لاندې دي.
د راپور له مخې دغه ماشومان هره ورځ د بشري حقونو له جدي سرغړونو سره مخ دي او له خپلو بنسټیزو حقونو بې برخې کېږي.
یونېسف ټینګار کړی چې دغه وضعیت باید د یوې «نوې عادي پدیدې» په توګه ونه منل شي او نړۍواله ټولنه باید د دغه حالت د پای ته رسېدو لپاره بېړني ګامونه پورته کړي.
په راپور کې راغلي، ماشومان په ځانګړي ډول د جګړو پر وړاندې ډېر زیانمنونکي دي او د جګړو تر ټولو زیات زیانونه همدوی ګالي.
د یونېسف په باور دوی نه یوازې د چاودېدونکو وسلو په پایله کې وژل کېږي یا ټپیان کېږي، بلکې له خپلو کورنیو څخه بېلېږي، کورونه یې ورانېږي، او د جګړو د شرایطو له امله ډېر ماشومان د جنسي ځورونو او تاوتریخوالي قرباني کېږي. همدارنګه، د ښوونځیو او روغتونونو پر وړاندې د بریدونو له کبله دوی له تعلیمي او روغتیایي خدمتونو بې برخې کېږي او ډېری یې ان له بشري مرستو هم بې برخې کېږي.
یونېسف ویلي چې حکومتونه او نړۍوال بنسټونه باید بېړنیو اقداماتو ته لومړیتوب ورکړي. د جګړو ښکېلې خواوې باید ژر تر ژره خپلې ژمنې پوره کړي او د ماشومانو ساتنه یقیني کړي، پر ښوونځیو، روغتونونو او استوګنیزو سیمو بریدونه ودروي، او د هغو ماشومانو د خوندیتوب لپاره کوټلي ګامونه پورته کړي چې د جګړو لپاره ګمارل شوي یا د جنسي او فزیکي ځورونو ښکار شوي دي.
یونېسف همدارنګه د جګړې سیمو کې ماشومانو ته د بشري مرستو د خوندي لاسرسي غوښتنه کړې، ځکه چې ډېری ماشومان د شخړو له امله اړینې مرستې نه شي ترلاسه کولای.
دغه سازمان له حکومتونو او نړۍوالو ادارو غوښتنه کړې چې د جګړو د درولو او د ماشومانو د ساتنې په برخه کې د نړۍوالو قوانینو په پلي کېدوکې له خپل اغېز کار واخلي. نړۍواله ټولنه باید د بشري مرستو د ملاتړ لپاره مالي سرچینې زیاتې کړي، د جګړو په سیمو کې د ماشومانو د حقونو د سرغړونو څارنه وکړي، او د جګړو د پای ته رسېدو لپاره عملي او ډیپلوماټیک اقدامات وکړي.
