پاکستانی چارواکی وايي طالبان مسوول دي چې افغان خاوره د ترهګرو له کارونې را وګرځوي
د پاکستان د پلان او پراختیا وزیر احسان اقبال وايي که کومه ډله په افغانستان کې د ترورېزم لپاره پټنځی ومومي، دا د طالبانو مسوولیت دی چې مخه یې ونیسي. دغه پاکستاني چارواکي زیاته کړه چې پاکستان د افغانستان د خلکو لپاره ډېرې قربانۍ ورکړې دي.
د پاکستان د پلان او پراختیا وزیر د شنبې په ورځ «د مرغومي۱۵مه» په لاهور کې په یوه غونډه کې وویل، چې هېواد یې د اقتصادي ثبات د ترلاسه کولو لپاره د سیاسي کړکېچ کمول غواړي.
احسان اقبال ټینګار کړی، چې پاکستان هڅه کوي طالبان له خپلې خاورې د «ترهګریزو» فعالیتونو د کارولو مخه ونیسي.
هغه وویل، "زموږ هیواد د مخدره توکو او ټوپک له مخ پر ډېرېدو کلتور سره مخ دی. که کومه ډله په افغانستان کې د ترورېزم لپاره پناه اخلي، د افغان حکومت مسوولیت دی چې مخه یې ونیسي.»
دغه پاکستاني چارواکي دغه راز تېر حکومت د "ترهګرو" د راستنېدو مسوول وباله او زیاته یې کړه، چې هېواد یې د ترهګرۍ له نوې څپې سره مخ دی.
احسان اقبال وويل: "د پاکستان خلکو د افغانستان د خلکو لپاره ډېرې قربانۍ ورکړې او لا یې هم له اغیزو سره مخ دي."
د طالبانو او پاکستان ترمنځ په دې وروستیو کې اړیکې د امنیتي او سرحدي ستونزو له امله ترینګلې شوې دي.
پاکستان اندېښنه لري چې ترهګرې ډلې د افغانستان له خاورې ددوی پر سرحدي سیمو د بریدونو لپاره کار اخلي، خو طالبانو تل دا تورونه رد کړي دي.
