ملګري ملتونه: لبنان کې د جګړې له درېدو سره لاهم په زرګونو کورنۍ له سختو ننګونو سره مخ دي
ملګري ملتونه وایي، چې په لبنان کې د جګړې له بندېدو سره لاهم په زرګونو کورنۍ له سختو ننګونو سره مخ دي. دغه سازمان پر اېکس پاڼه کاږلي، چې کورونو او زېربناوو ته د اوښتو زیانونو له امله تر ۱۶۰ زره ډېر خلک په لبنان کې بې ځایه شوي.
دغه سازمان دارنګه په لبنان د بشرپالو اړتیاوو د پوره کولو لپاره له خپلو هلو ځلو خبر ورکړی.
له بل پلوه د حزبالله مشر وايي، ډله یې چمتو ده چې د اسراييل سرغړونو ته ځواب ورکړي.
نعیم قاسم وايي، حزبالله چمتو دی چې له اوربنده د اسراییل سرغړونو ته ځواب ورکړي.
وروسته له هغه چې د حزبالله او اسراییل ترمنځ د نومبر په وروستیو کې د اوربند هوکړه وشوه، اسراییل او حزبالله یو بل له دغې هوکړې په سرغړونې تورنوي.
د اوربند د هوکړې له مخې به اسراییلي پوځ د لبنان له سوېلي سیمو وځي.
تر دې وړاندې هم په لبنان کې د ملګرو ملتونو سوله ساتو ځواکونو ویلي و: «موږ په ټولو خواوو غږ کوو، چې د ملکي شتمنیو او زېربناوو د ویجاړولو په ګډون د هر هغه عمل څخه ډډه وکړي چې د جګړې پای ته رسېدنې ته ګواښ پېښوي.»
