د طالبانو د لوړو زده کړو وزیر وايي د هبت الله له امر نه سرغړونه د خدای نافرماني ده

د طالبانو د لوړو زده کړو وزیر ندا محمد ندیم ویلي چې د دې ډلې د مشر له امر نه سرغړونه نه یوازې ناروا ده، بلکې د خدای نافرماني هم ده. هغه ټینګار کړی، چې که طالبان له دغو حکمونو سرغړونه وکړي، نو ولس به هم د دوی په نافرمانۍ کې څو ګامه نور هم لاړ شي.

د طالبانو د لوړو زده کړو وزير ندا محمد ندیم د مرغومي پر ١٥مه، د کابل د لويې جرګې په تالار کې د ديني مدرسو د فارغانو د فراغت په غونډه کې وويل، چې هر څوک بايد د دې ډلې د مشر حکم ومني.

هغه د خپلو خبرو په يوه برخه کې وويل:«هيڅوک حق نه لري چې د مسلمانانو د امير له حکم څخه سرغړونه وکړي.»

ندا محمد ندیم د دې ډلې مشر ته یو له نږدې او باوري کسانو ګڼل کیږي.

ندامحمد ندیم وویل چې د خدای او امیر د حکم په منځ کې فرق څه دی، یوازې دادی چې دا موقت دی او هغه دایمي دی.

دغه طالب چارواکي د کوم مشخص کس نوم وانخيست، خو دا څرګندونې په داسې حال کې کېږي، چې له دې وړاندې هم د طالبانو د ډلې د مشرتابه ترمنځ د اختلافاتو راپورونه ورکړل شوي وو.

نیویارک ټایمز د اکتوبر پر درېیمه په یوه مقاله کې لیکلي و، چې طالبانو هڅه کړې چې واک ته له ستنیدو راهیسې د یووالي انځور وړاندې کړي، خو په حقیقت کې د طالبانو چارواکي جدي اختلافات لري.
په مقاله کې ويل شوي چې سراج الدين حقاني د هبت الله اخوندزاده له حکمونو ناراضه دی او هغه له ځينو اروپايي او عربي هېوادونو، روسيې او چين سره ډيپلوماتيکې اړيکې لري.