د روغتیا نړۍوال سازمان: په ۲۰۲۴ کې مو د افغانستان دننه د ساري ناروغیو د پېښو مخنیوی کړی
د روغتیا نړۍوال سازمان په خپل وروستي راپور کې ویلي چې په ۲۰۲۴ زیږدیز کال کې یې د اروپايي اتحادیې په مالي ملاتړ او همکارۍ، په ټول افغانستان کې ۳۴ د ساري ناروغیو د څارنې او درملنې کاري ډلې ځای پر ځای کړې دي.
دغو کاري ډلوپه ټول هېواد کې د ساري ناروغیو د پېژندلو، څېړلو او د خپرېدو د مخنیوي په برخه کې کار کوي.
د راپور له مخې، د څارنې دغوکاري ډلو په تېر یو کال کې د ساري ناروغیو د خپرېدو د ۳۱۵ پېښو پر وړاندې چټک او اغېزمن ګامونه پورته کړي دي.چې په دغو هڅو کې د نارغیو لومړنۍ پېژندنه، دقیقه څېړنه او چټک مخنیوی شامل وو.
نرۍ رنځ، ملاریا، سینه بغل، ګوزڼ، شری او اسهال د هغو ساري ناروغیو په نوملړ کې دي چې د افغانستان دننه یې شمېر خورا لوړ دی او د هېواد په بېلابېلو ولایتونو کې ترې خلک کړېږي.
په وروستیو کلونو کې افغانستان د روغتیا په برخه کې له ستر ګواښونو سره مخامخ دی. د اقتصادي کړکېچونو زیاتوالی، په کافي توګه روغتیایي خدمتونو ته نه لاسرسی او د نړۍوالو مرستو کموالی هغه لاملونه دي چې د ساري ناروغیو د خپریدو ګواښونه یې زیات کړي دي.
