اتمر وايي د ډیورنډ کرښې لاسلیکوونکي او موافقان د ملت د ارادې له مشروعیته برخمن نه دي
د افغانستان په تېر جمهوري حکومت کې د بهرنیو چارو وروستی وزیر محمد حنیف اتمر د ډيورنډ کرښې په اړه وايي چې «د یوه ملت د خاورې برخلیک یوازې او یوازې همغه ملت پورې تړاو لري». اتمر وايي، کله چې دا حق له ملتونو اخیستل شوی، د بشریت متمدن تاریخ هغه تېری او اشغال ګڼلی.
د افغانستان د بهرنیو چارو پخوانی وزیر محمد حنیف اتمر نن یکشنبه« د مرغومي ۱۶مه» پر خپل اېکس د ډیورنډ کرښې په اړه غبرګون ښودلی دی.
اتمر وايي، « د ډیورنډ کرښې لاسلیککوونکي او هغه کسان چې د هر دلیل له مخې یې مني، دا حق له پامه غورځولی او له همدې کبله زموږ د ملت د ارادې له مشروعیت څخه برخمن نه دي.»
اتمر وايي چې د نورو ملتونو بریالیو تجربو ته باید پام وشي او ټینکار کوي چې «زموږ خلک به خپله مشروع مبارزه د ځمکنۍ بشپړتیا، خپلواکۍ او ملي حاکمیت لپاره د ولس د ازادو رایو پر بنسټ مخته یوسي».
یوه اونۍ وړاندې د طالبانو د دفاع وزارت ویاند عنایت الله خوارزمي ویلي و، چې د دوی حکومت هم پښتونخوا د پاکستان د خاورې برخه نه ګڼي.
د طالبانو دفاع وزارت ویاند عنایت الله خوارزمي د رویټرز خبري اژانس د دې پوښتنې په ځواب کې چې ایا دغه څرګندونې یې پاکستان ته اشاره ده، وویل، "موږ دا د پاکستان خاوره نه ګڼو، نو موږ دا نه شو تاییدولی چې دا د پاکستان په خاوره کې بریدونه دي، خو دا برید "د فرضي کرښې بل اړخ ته شوی دی."
