د طوطیانو تجارت؛ طالبانو له کندهار څخه کویټ ته ۶۰۰ طوطیان صادر کړل
د کندهار د کرنې، اوبولګولو او مالدارۍ ریاست وايي چې د دغه ولایت له یوه خصوصي ژوبڼ څخه یې د "لاوبیرډ" نسل ۶۰۰ طوطيان کویټ ته صادر کړي دي. د طالبانو سیمه ییزو چارواکو ویلي، چې دغه طوطیان له ۱۵ ورځو قرنطین وروسته کویټ ته لېږدول شوي دي.
د طالبانو د کندهار د کرنې ریاست د مرغومي پر ١٦مه نېټه خبر ورکړ چې په سلګونو طوطیان د نړيوالو روغتيايي سندونو د ترلاسه کولو په مقصد له ازموينو وروسته کويټ ته لېږدول شوي دي.
باختر اژانس کویت ته د دغو مرغانو د صادرولو د عاید په اړه نور جزئیات نه دي ورکړي.
د معلوماتو له مخې، له دې وړاندې هم د کندهار له یوه خصوصي ژوبڼ څخه قطر ته ۳۰۰ طوطیان صادر شوي دي.
په راپور کې ویل شوي، چې "لاوبیرډ" طوطیان د ښکلا او بېلو ځانګړتیاوو له امله په نړیوالو بازارونو کې ډېر ارزښت لري.
دا راپور په داسې حال کې خپرېږي، چې په افغانستان کې د نادرو مرغانو او ژویو د ښکار په اړه اندېښنې شته.
که څه هم د طالبانو مشر هبت الله اخوندزاده په یوه ځانګړي فرمان کې د نایابه مرغانو پر ښکار بندیز لګولی، خو لا هم د دغو مرغانو د ښکار او قاچاق راپورونه خپرېږي.
