د اوربند له خبرو پیل سره اسراییلي پوځ د غزې په تړانګه کې لسګونه کسان وژلي
فلسطیني ډاکټران وایي، په داسې حال کې چې منځګړو هېوادونو په قطر کې د اوربند خبرې پیل کړي، د شنبې سهار وختي اسراییلي پوځ د غزې ښار پر یوه کور برید وکړ، چې پایله کې یې ۱۲ کسان ووژل شول.
د راپورونو له مخې، له یاد شمېر وژل شویو کسانو سره په تېرو ۲۴ ساعتونو کې د قربانیانو شمېر ۶۲ کسانو ته ورسېد.
د سیمې اوسېدونکي او ډاکټران زیاتوي، چې لږ تر لږه ۱۴ کسان د الغوله کورنۍ په کور کې وو، کله چې برید وشو او ودانۍ یې ویجاړه کړه.
د رویټرز د راپور له مخې، د دغې پېښې په اړه اسراییلي پوځ لا څه نه دي ویلي.
اسراییلي پوځ د شنبې په ورځ په یوې بیانیه کې وویل، چې د دوی ځواکونو د دې اونۍ په پای کې د بیت حنون په ښارګوټي کې خپلو عملیاتو ته دوام ورکړی، چېرې چې پوځ له درېیو میاشتو راهیسې عملیات کوي او یو پوځي کمپلکس چې د حماس وسله والو له خوا کارول کېده ویجار کړی دی.
د شنبې په ورځ ناوخته د غزې په مرکزي برخه کې د دیر البلاح په ختیځ کې د اسراییلي پوځ هوایي برید له امله په یوه موټر کې درې کسان ووژل شول.
د اسراییل په عملیاتو کې د فلسطینیانو د وژلو شمېر په داسې حال کې مخ په زیاتېدو دی، چې منځګړي په قطر کې د ۱۵ میاشتنۍ جګړې او د یرغمل شویو د خوشې کېدو لپاره بیا د اوربند خبرې پیل کړي.
اسراییلي منځګړي د قطر او مصر د منځګړیتوب په همکارۍ په دوحه کې د خبرو د بیا پیل لپاره استول شوي او د جو بایډن اداره چې په دې خبرو کې مرسته کوي، د جمعې په ورځ له حماس څخه وغوښتل، چې یوې هوکړې ته سره ورسېږي.
حماس وایي، چې هوکړې ته د رسېدو لپاره ژمن دی خو څرګنده نه ده، چې دواړه لوري څومره نږدې شوي دي.
اسراییل د ۲۰۲۳ کال د اکټوبر په ۷مه د حماس د برید په ځواب کې پر غزې خپل برید پیل کړ، چې د غزې روغتیایي چارواکو د معلوماتو له مخې تر دې دمه یې شاو خوا ۴۵ زره او ۷۱۷ فلسطینیان وژلي دي.
د یادولو ده، چې حماس د ۲۰۲۳ کال د اکټوبر په اوومه پر اسراییل برید وکړ، ۱۲۰۰ کسان یې ووژل او شاوخوا ۲۵۰ نور یې یرغمل کړل.
