د بلوچستان په تربت کې د پاکستاني پوځیانو پر موټر چاودنه کې ۶۱ کسانو ته مرګژوبله اوښتې

د بلوچستان په تربت کې د پاکستاني ځواکونو پر موټر چاودنه کې ۶۱ کسانو ته مرګ ژوبله اوښتې ده. په دې چاودنه کې ۵ کسان وژل شوي او په ټولییزه توګه ۵۶ کسان ټپیان دي.

د راپورونو له مخې، په ټپيانو کې بیا د پنځو کسانو وضعیت د اندېښنې وړ بلل شوی دی.

دغه تازه معلومات پاکستاني انلاین رسنۍ خراسان ډایري پر خپل اېکس خپاره کړي دي.

دا چاودنه څو ساعته مخکې د بلوچستان د تربت اړوند نیو بهمن سیمه کې د سړک په غاړه د پاکستاني ځواکونو پر یوه کاروان شوې ده.

د بلوڅو بېلتون پالې ډلې چې ځانته مجید لوا سرتېري هم وايي، د دغه برید مسوولیت منلی او وايي، چې د دوی یوه غړي ځانمرګی برید کړی دی.

د ویلو ده، چې د بلوڅو بېلتون پالې ډلې مجید لوا سرتېري په نامه د دغې وسله والې ډلې د دغه برید ویډیو هم افغانستان انټرنشنل ترلاسه کړې ده.

په دې ویډیو کې د ځانمرګي برید شېبې ښودل کېږي او شاوخوا غیر نظامي موټر هم لیدل کېږي.

له برید وروسته په نظامي موټر کې اور لګېدلی دی.

تر دې وړاندې د پاکستان جیو نیوز بیا په دغه چاودنه کې د څلورو تنو د وژل کېدو او د ۳۲ نورو د ټپي کېدو خبر ورکړی و.