په کالیفرنیا کې د الوتکې د غورځېدو له امله ۲۰ کسانو ته مرګ ژوبله اوښتې
د متحده ایالاتو په کالیفرنیا ایالت کې یوې وړې الوتکې له یوې سوداګریزې ودانۍ سره ټکر کړی، چې له امله یې دوه کسان وژل شوي او ۱۸ نور ټپیان دي. د راپورونو له مخې، پېښه د لاس انجلس په ۲۵ کیلومترۍ کې د فلرټن ښاروالۍ هوايي ډګر ته څېرمه شوې ده.
د پولیسو په وینا تر اوسه معلومه نه ده چې وژل شوي کسان په الوتکه کې موجود وو او که په هغې ودانۍ کې وو چې الوتکه پرې غورځېدلې.
د فدرالي هوايي چلند ادارې په وینا، لوېدلې الوتکه (وینز ار وي ۱۰) ماډل وه، چې څلور څوکۍ یې درلودې.
د دغې الوتکۍ د غورځېدو د لامل په اړه یې پلټنې روانې دي.
د يادونې وړ ده چې په دې وروستيو کې د الوتکو د غورځېدو په شمېر کې زياتوالى راغلى او په تېرو څو ورځو کې په اذربايجان او سویلي کوريا کې د مسافر وړونکو الوتکو د غورځېدو پېښه کې تر ٢٠٠ ډېر کسان وژل شوي دي.
