هسپانیا ته ۲۰۲۴ کې شاو خوا ۶۴ زره پناه غوښتونکي تللي چې له دې سره یې نوی ریکارډ جوړ کړ

د هسپانیا د کورنیو چارو وزارت د معلوماتو له مخې، هسپانیا ته په ۲۰۲۴ کال کې د پنا غوښتونکو د راتګ نوې ریکارډ جوړ شوی. په ۲۰۲۴ کال کې ۶۳ زره او ۹۷۰ پناه غوښتونکي د ځمکې او سمندر له لارې په نامنظمه توګه دغه هېواد ته ننوتي دي.

نږدې ۶۴۰۰۰ پناه غوښتونکي په نا منظم ډول د هسپانیا له پولو څخه تیر شوي چې د ۲۰۲۳ په پرتله ۱۲.۵ سلنه ډېروالی ښیي.

دا دویم پرله پسې کال دی چې هسپانیا ته د پنا غوښتونکو د رسېدو ریکارډ جوړیږي. په ۲۰۲۳ کې، دغه شمېره نږدې ۵۵،۷۱۸ وه خو په ۲۰۲۲ کې ثبت شوی شمېر نږدې دوه چنده وو.

د مالوماتو له مخې په ۲۰۲۴ کال کې د ناقانونه پنا غوښتونکو راتګ لوی اکثریت ۴۶،۸۴۳ د سمندر له لارې، له شمال لویدیز افریقا څخه د هسپانیا کانري ټاپوګانو ته سفر کړی.

د ډسمبر په میاشت کې د نادولتي موسسې کیمینانډو فرونټراس له خوا خپور شوي راپور له مخې، په ۲۰۲۴ کې هسپانیا ته د پنا غوښتونکو د رسیدو په هڅه کې هره ورځ په اوسط ډول ۳۰ تنه مړه شوي، چې نږدې ۱۰۰۰۰ کسان د کانري ټاپوګانو ته د رسیدو په هڅه کې مړه شوي.