فرانس خبري اژانس: په پاکستان کې افغان کډوال د نیول کېدو له وېرې د بندیانو په څېر ژوند کوي
په پاکستان کې مېشتو افغان کډوالو فرانس خبري اژانس ته ویلي، چې په دغه هېواد کې د ناامنیو او د اسلام اباد او افغان طالبانو ترمنځ د سیاسي کړکېچ له زیاتېدو سره پر کډوالو فشارونه زیات شوي. کډوال وايي، د سختو بندیزونو، نیولو، وهلو او ټولنیزو فشارونو له امله په کورونو کې بندیان دي.
دغه کډوال وايي، له سختو شرايطو سره مخ شوي، چې ډېرو ته په افغانستان کې د طالبانو تر واکمنۍ لاندې د ژوند تېرول یادوي.
په وروستیو ورځو کې افغان کډوالو افغانستان انټرنشنل ته ویلي، چې د اسلام اباد پولیسو لسګونه افغانان نیولي دي.
دوی هغه مهال ونیول شول کله، چې په اسلام اباد کې د استوګنې کارتونو د ترلاسه کولو لپاره د پوليسو څانګې ته ورغلل.
لاریونونه او د نیولو زیاتوالی
په تېر کال کې د پاکستان حکومت شاوخوا ۷۵۰ زره افغانان چې اسناد يې نه درلودل ایستلي دي.
د عمران خان په مشرۍ د تحريک انصاف ګوند له وروستيو لاريونونو وروسته پاکستاني چارواکو ويلي وو، چې په دغو لاريونونو کې افغانانو برخه اخيستې او پوليسو يو شمېر کسان هم نيولي دي.
خو افغان طالبانو دغه تورونه رد کړي دي.
په اسلام اباد کې د افغاني ټولنې يو مشر محمد خان وايي، چې په دې موده کې نږدې ٢٠٠ افغانان نيول شوي، په داسې حال کې، چې چارواکي يې شمېر شاوخوا ٣٠ تنه ښيي.
هغه وايي، افغانان «د پاکستان د داخلي ستونزو قرباني شوي» او د پاکستان حکومت یې د خپلو سیاسي او اقتصادي مسایلو کې د سپر په توګه کاروي.
افغانان د سیاسي کړکیچونو قربانیان دي
هغه پناه غوښتونکي، چې لویدیځو هیوادونو ته د تلو په تمه دي وايي، چې په سیاسي کشمکشونو کې ښکیل کړل شوي دي.
۳۱ کلن افغان کډوال مصطفا، چې له خپلې کورنۍ سره د امریکا وېزې ته په تمه دی وویل: «دلته له راتلو وروسته داسي احساس کوو، چې موږ له یوه کندې کوهې ته لوېدلي يو.»
هغه زیاته کړه: «که هغوی ته مالومه شي چې تاسو افغان یاست، که تاسو ویزه لرئ او که نه، هغوی تاسو نیسي او یا له تاسو څخه پیسې غواړي.»
له هغه وروسته، چې په ۱۴۰۰ کال د زمري په مياشت کې طالبان په افغانستان کې بیا واک ته ورسېدل، دېری افغانان لوېديځو هېوادونو ته د تګ لپاره پاکستان ته تللي.
افغان کډوال وايي، چې دغه بهير ډېر ورو روان دی.
خوندي هیوادونو ته د لیږد لپاره اوږد انتظار
شهرزاد چې د يوه اروپايي هېواد په سپارښتنه پاکستان ته تللی وايي، چې په پاکستان کې يې ژوند د افغانستان له سختو شرايطو سره ډېر ورته دی او دی او کورنۍ يې په عملي توګه بنديان دي.
د بشري حقونو مدافع وکیله ایمان مزاري، چې د اسلام اباد په محکمو کې د نیول شویو افغانانو دفاع کوي وايي، اعتراضونه په اسلام اباد او راولپنډۍ کې د پښتنو کډوالو د نیولو لامل شوي.
هغه وايي، پوليسو دا جواز ترلاسه کړى، چې هر څوک وغواړي، ونيسي او پيسې ترې واخلي.
د پاکستان د بشري حقونو کمیسیون هم د افغانانو د «قومي پېژندګلوۍ» په اړه ژوره اندېښنه څرګنده کړې او له پولیسو یې غوښتي، چې «په هېواد کې د بېلابېلو ټولنو تر منځ د اختلافاتو له رامنځته کولو» څخه ډډه وکړي.
