په تېرو ۲۴ ساعتونو کې اسراییل په غزه کې تر ۶۰ ډېر فلسطینیان وژلي

په غزه کې روغتیایي سرچینې وایي، اسراییلي پوځ د غزې په سویل کې د المواسي په نوم "بشري سیمه" بمبار کړې، چې لږترلږه ۱۲ فلسطینیان یې وژلي دي، یادو سرچینو زیاته کړې، چې نور بریدونه هم ترسره شوي چې تر اوسه په کې تر ۶۳ فلسطینیانو د وژنې راپورنه ترلاسه شوي.

بل پلو،اسراییل هم د اوربند د دوام سره سره د لبنان په سویل کې د حزب الله پر مرکزونو د برید ادعا کړې ده.

لومړي وزیر بنیامین نتنیاهو یوه پلاوي ته اجازه ورکړې، چې د غزې په تړانګه کې د اوربند د خبرو لپاره د قطر پلازمېنې دوحې ته سفر وکړي.

د غزې په تړانګه کې د اسراییل په جګړه کې د ۲۰۲۳ کال د اکتوبر له اوومې راهیسې لږ تر لږه ۴۵ زره او ۵۸۱ فلسطینیان وژل شوي او ۱۰۸ زره او ۴۳۸ نور ټپیان شوي دي.

همدا ډول د حماس تر مشرۍ لاندې په همدې موده کې په اسراییل کې لږ تر لږه ۱۱۳۹ کسان وژل شوي او تر ۲۰۰ زیات یرغمل شوي دي.