د فلسطین احصایې اداره وايي، د غزې نفوس د جګړې له پیله شپږ سلنه کم شوی دی
د فلسطین د احصایې اداره وايي، پر غزې د اسراییل د برید له پیل راهیسې د نفوسو شمېر ۱۶۰ زره کم شوی دی. د دغې ادارې په وینا، د غزې نفوس د تېرو کلونو پرتله شپږ سلنه کم شوی دی.
د فلسطین د احصایې مرکزي ادارې د سې شنبې په ورځ د یوې اعلامیې په خپرولو سره وویل، چې شاوخوا سل زره فلسطینیان له دغې سیمې څخه وتلي او اټکل کېږي چې له ۵۵زرو څخه ډېر کسان وژل شوي دي.
خو د فلسطین د روغتیا وزارت د شمېرو له مخې، د جګړې له پیل راهیسې شاوخوا ۴۵زره او ۵۰۰ فلسطینیان چې نیمایي یې ښځې او ماشومان دي وژل شوي او ۱۱زره نور بیا تري تم دي.
د اسراییل د بهرنیو چارو وزارت بیا دغه شمېرې ناسمې بللې او وایي: «د دغو شمېرو په خپرولو دوی غواړي، چې اسراییل پرې بدنامه کړي.»
د بشري حقونو مخکښو ډلو هم اسراییل تورن کړي، چې د غزې په جګړه کې یې نسل وژنه کړې ده.
اسراییل په پرله پسې ډول دغه تورونه رد کړي، او ادعا یې کړې چې دوی نړۍوالو قوانینو ته پاملرنه کوي او د حماس په وړاندې له ځان څخه د دفاع حق لري.
د احصایې ادارې ویلي، چې د غزې شاوخوا ۲۲ سلنه نفوس اوس مهال د سختې لوږې سره مخامخ دی.
د دغې ادارې په وینا، شاوخوا ۳۵۰۰ ماشومان د خوارځواکۍ او د خوړو د نشتوالي له امله د مړینې له ګواښ سره مخ شوي دي.
په راپور کې ویل شوي، شاوخوا ۶۰،۰۰۰ مېندواره مېرمنې هم په غزه کې له جدي روغتیایي ګواښونو سره مخامخې دي.
