د خوړو نړۍوال پروګرام: د بودجې د کمښت له امله تر ۷ مېلیونو ډېر کسان له مرستو بې برخې کېږي

په افغانستان کې د خوړو نړۍوال پروګرام د بېړني وضعیت مشره پاولین اېلوف وایي، چې سږکال د بودجې د کمښت له امله تر ۷ مېلیونو ډېر کسان له بشري مرستو بې برخې کېږي.

نوموړې په یوه ویډیویي پیغام کې ویلي، چې په افغانستان کې ژمی سخت دی او د څو میاشتو لپاره د سختو واورو له امله د ډېرو مرستندویه بنسټونو فعالیتونه ټکني کېږي.
هغه د افغانستان له یوې لرې پرتې سیمې راپور ورکوي او وایي، د دې لپاره چې ډاډ ترلاسه شي چې خورا زیان منونکې کورنۍ د ژوندي پاتې کېدو لپاره د اړتیا وړ خواړه لري، اړمنو خلکو ته کافي خواړه ورکوي چې سخت ژمی پرې تېر کړي.
هغه زیاتوي، دلته د خوړو ترلاسه کول اسانه کار نه دی.
د هغې په وینا: «زموږ ټیمونه له څو میاشتو راهیسې کار کوي، چې د افغانستان په لرې پرتو سیمو کې مخکې له دې چې سړکونه د واورو له امله وتړل شي؛ مرستې ورسوي.»
هغه وړاندې وایي، د دغو مرستو پرته کورنۍ یو ناشونی انتخاب لري چې ماشومان ماړه کړي او که کور ورته ګرم کړي.
د اغلې اېلوف په خبره، سږ کال د بودجې د کمښت له امله له ټولو اړمنو کسانو سره مرسته نه شي کولای.
د راپورونو له مخې، د افغانستان د خلکو يو پر درېیمه برخه یعنې ۱۵ مېلیونه خلک په روان ژمي کې خوراکي توکو ته سخته اړتیا لري.
دغه پروګرام تېره اونۍ هم ویلي و، چې په سږني ژمي کې د بودجې د کمښت له امله په افغانستان کې یوازې له شپږ مېلیونو کسانو سره مرسته کولای شي.
دغه پروګرام پر خپلې پاڼې دا هم لیکلي و، چې په افغانستان کې تر ۹۰ سلنې ډېر خلک کافي خواړه نه لري.