مولوي عبدالکبیر: هېوادونه دې د خپلو ناکامیو پړه پر موږ نه اچوي

د طالبانو د ریاست الوزرا سیاسي مرستیال مولوي عبدالکبیر پاکستان ته په اشارې سره وایي، چې هېوادونه دې د خپلو کورنیو ناکامیو پړه پر طالبانو نه اچوي او د سیمې نظم او ټیکاو دې له منځه نه وړي.

نوموړي دغه څرګندونې تېره ورځ د شاه او عروس بند په پرانیست غونده کې د وینا پرمهال کړې دي.
که څه هم هغه د کوم هېواد نوم نه دی اخیستی؛ خو ویلي یې دي، هغوی چې خپلو موخو ته د رسېدو لپاره پر دغه ډله فشار راوړي، بریالي به نه شي.
هغه زیاته کړې: «هغه کسان چې د افغانستان لپاره ښه نیت نه لري او خپلو موخه ته د رسېدو لپاره پر هېواد د فشار راوړنې په لټه کې دي؛ موږ هغوی ته بلنه ورکوو، چې د افغانستان تارېخ یو وار بیا مطالعه کړي او په اړه یې فکر وکړي.»
د هغه په وینا، پر طالبانو فشار راوړل بې ګټې دی.
هغه وړاندې ویلي، چې د افغانستان ټیکاو د سیمې او نړۍ په ګټه دي.
دغه څرګندونې وروسته له هغه کېږي، چې څو ورځې وړاندې پاکستان د پکتیکا په برمل او سپېرې ولسوالۍ کې هوايي بریدونو کړي وو او ورپسې بیا افغان طالبانو هم په ځوابي بریدونو کې پر ډیورنډ کرښه پر پاکستاني پوستو بریدونه وکړل.
خو پاکستان ویلي و، چې دوی د ټي‌ټي‌پي پر پټنځایونو او روزنیزو مرکزونو بریدونه کړي وو.
پاکستان تل په دغه هېواد کې د ناامنیو لپاره د پړې ګوته افغان طالبانو ته نېولې ده؛ خو طالبانو هم په وار، وار دغه ادعاوې ردې کړې دي.