په ملګرو ملتونو کې د اسراییل استازی: حماس ډله روغتونونه د ترهګریزو فعالیتونو لپاره کاروي
په ملګرو ملتونو کې د اسراییل دایمي استازي ډینیل مېرون ویلي، چې د غزې پر روغتونونو د بریدونو په اړه د ملګرو ملتونو راپور ناسم دی.
د ملګرو ملتونو د بشري حقونو دفتر په خپل وروستي راپور کې د غزې پر روغتونونو د اسراییل بریدونه غندلي وو او دغه بریدونه یې په غزه کې د روغتیايي نظام لپاره ویجاړونکي بللي وو.
ښاغلي مېرون پر اېکس پاڼه کاږلي، چې اسراییل د نړۍوال قانونو سره سم عملیات کوي.
د هغه په وینا، اسراییل هیڅکله ولسي وګړي نه په نښه کوي.
نوموړي د حماس ډله تورنه کړې، چې له روغتونونو څخه د ترهګریزو فعالیتونو لپاره کار اخلي.
د ملګرو ملتونو سازمان لهخوا په خپور شوي راپور کې راغلي و، چې په غزه کې د ۲۰۲۳ کال د اکټوبر له ۷مې راهیسې پوځي عملیاتو روغتیایي سیستم "له منځه" وړی دی.
په راپور کې راغلي، چې په قصدي ډول پر روغتونونو او د ټپیانو د د درملنې پر ځایونو بریدونه په جنګي جرمونو کې راځي.
د راپور له مخې، په غزه کې د روغتیایی نظام ویجاړول، د ناروغانو، طبی کارکوونکو او نورو ملکیانو وژل له نړۍوالو قوانینو او د بشری حقونو له قوانینو ښکاره سرغړونه ده.
د روغتیا نړۍوال سازمان او نورو سازمانونو هم په تېرو څو ورځو کې د غزې پر روغتونونو د اسراییل لهخوا په ترسره شویو بریدونو نیوکه کړې وه.
اسراییلي پوځ بیا ادعا کړې، چې حماس د پوځي عملیاتو لپاره له روغتونونو څخه د قوماندې د مرکزونو په توګه کار اخلي او اسراییل هم له روغتونونو څخه نیول شوي کسان مشکوکو وسلهوالو بللي دي.
