ماسک ته د جرمني د صدراعظم غیر مستقیم ځواب؛ د جرمني برخلیک د ټولنیزو رسنیو مالکان نه ټاکي
د جرمني لومړي وزیر اولاف شولڅ د نوي کال په تړاو خپله وینا کې د ټکنالوژۍ د میلیاردر ایلن ماسک د څرګندونو په ځواب کې وویل چې د جرمني خلک د خپل هېواد د برخلیک پرېکړه کوي، نه د ټولنیزو شبکو مالکان.
نوموړي وویل، « تاسې د جرمني وګړي د خپل هېواد د برخلیک پریکړه کوئ، نه د ټولنیزو رسنیو څښتنان».
شولڅ په خپله وینا کې د اېکس د څښتن ایلن ماسک نوم یاد نه کړ، خو اشاره یې د ماسک وروستیو څرګندونو ته وه.
ماسک په وروستیو کې د جرمني د ښي اړخي ګوند اې ایف ډي ملاتړ کړی، چې په جرمني کې له سختو غبرګونونو سره مخ شوی.
ماسک د جرمني مشهورې ورځپاڼې ویلټ ام زونټاګ کې په یوه لیکنه کې د یاد ګوند ملاتړ کړی.
د جرمني د اقتصاد وزیر او مرستیال صدراعظم رابرت هابیک وویل چې ماسک هغه ځواکونه پیاوړي کوي چې د اروپا کمزوري کولو هڅه کوي.
د جرمني سیاستوالو په ګډه ماسک تورن کړی چې غواړي د خپلو نظریاتو او نفوذ له لارې د جرمني ټاکنیزه پروسه اغېزمنه کړي.
د اې ایف ډي ملاتړ له ښي اړخو سیاستونو سره د ماسک د تړاو څرګندونه کوي.
دغه ګوند چې په ۲۰۱۳ کال کې د یورو ضد نظریو پر بنسټ جوړ شوی و، اوس د جرمني سخت دریځی ګوند بلل کېږي.
د پولیټیکو د رپوټ له مخې، په وروستیو سروې ګانو کې د محافظه کار مسیحي ډیموکراټ اتحادیې مشر فریدریښ مېرڅ مخکښ دی، چې ویلي یې دي که واک ته ورسیږي له ټرمپ سره د معاملې توان لري.
شولڅ په خپله وینا کې ویلي چې « که څه هم افراطي نظرونه او لوړ غږونه ډېر پام جلبوي، خو د جرمني اکثریت هوښیار او شریف خلک به د دغه هیواد د راتلونکي پریکړه وکړي».
