پوتین له روسانو سره ژمنه وکړه چې راتلونکی کال به یې ډېر ښه وي
د روسیې ولسمشر د سې شنبه په ورځ د نوي کال په مناسبت په خپله وینا کې وویل، چې روسیه به په نوي کال کې په پوره اعتماد سره مخ په وړاندې ځي.
ولادیمیر پوتین د روسیې د ځپل شوي اقتصاد د ښه کولو یا په اوکراین کې د جګړې په اړه کومه کلکه ژمنه ونه کړه.
هغه وویل: «موږ ډاډه یوو چې هرڅه به سم شي او موږ به ښه پرمخ لاړ شوو.»
په داسې حال کې چې ډېری روسان د بیو د لوړېدو په اړه اندېښمن دي او د مرکزي بانک د ۲۱سلنه سود نرخ پر سوداګرو او د کور پېرودونکو فشار راوړی، پوتین روسیې ته ډاډ ورکړ چې د دوی هوساینه یې لومړیتوب دی.
هغه په دوېمه نړۍواله جګړه کې د نازي جرمني په ماتولو کې د روسیې د رول په ګډون د تېرو بریاوو په یادولو سره وویل چې د روسیې ننګونې د یوه پراخ تاریخي ماموریت برخه ده.
پوتین په خپله وینا کې، په ځانګړي ډول د اوکراین سره د جګړې حالت یا د ډونالډ ټرمپ د متحده ایالاتو د ولسمشر په توګه د بیرته راستنیدو وروسته د جګړې د پای ته رسیدو احتمال یادونه نه ده کړې.
په ۲۰۲۴ کې، روسي ځواکونو په اوکراین کې د ۲۰۲۲ په پرتله په چټکۍ سره پرمختګ وکړ او د هېواد شاوخوا یو پر پنځمه برخه یې ونیوله.
په ۲۰۲۴ کې ، د دویم نړۍوالې جګړې راهیسې د لومړي ځل لپاره د روسیې پر خاوره یرغل وشو. اوکراین د اګست په شپږمه په یوه ناڅاپي ځوابي برید کې د روسیې په لوېدیځ کې د کرسک سرحدي سیمې ونیولې او اوس هم ځینې برخې په واک کې لري.
