د مقاومت جبهې ادعا: په لسګونو کامیابو عملیاتو کې ۵۰۰ طالبانو ته مرګ ژوبله اوښتې

د مقاومت جبهې د بهرنیو اړیکو مسوول د سې شنبه په ورځ ادعا وکړه، چې دغې جبهې په ۲۰۲۴ کال کې د افغانستان په بېلابېلو ولایتونو کې د طالبانو پر ضد تر ۳۸۰ ډېر بریالي عملیات کړي دي.

علي میثم نظري وویل، چې په دغو بریدونو کې تر ۵۰۰ زیات طالبان وژل شوي یا ټپیان شوي دي.

نوموړي پر اېکس لیکلي، چې د مقاومت جبهې د خپلو عملیاتو ساحه د افغانستان ۲۰ ولایتونو ته غځولې ده.


نظري زياته کړې، چې په دغو بريدونو کې د جبهې ځواکونو ته تر ټولو کمه مرګ ژوبله اوښتې، خو هغه کره شمېرې په ډاګه کړې نه دي.
د مقاومت او ازادۍ جبهې دوه وسله والې مخالفې ډلې دي، چې په پرله پسې ډول د طالبانو پر پوستو او کمپونو د بریدونو ادعاوې کوي.
د مقاومت د جبهې تر ټولو سخت برید د تېر کال د حوت میاشتې په اوومه د کابل پر هوايي ډګر د توپونو ډزې وې.
دغې ډلې نن هم ادعا وکړه، چې د طالبانو د انرژۍ او اوبو د وزیر پر کاروان یې برید کړی، خو د طالبانو وزیر د دوی د موټرو پر کاروان برید رد کړی دی.