روسیې او اوکراین نږدې ۳۴۰ تنه یرغمل شوي پوځیان یو بل ته وسپارل

روسیې او اوکراین د دوشنبې په ورځ د عربي اماراتو په منځګړیتوب، ۳۳۹ تنه یرغمل شوي پوځیان یو بل ته وسپارل.

د اوکراین ولسمشر وویل چې ۱۸۹ اوکرایني یرغمل شوي چې په ډله کې یې سرتیري، پوله ساتي او دوه ولسي وګړي شامل و خوشې شوي دي. د روسیې د دفاع وزارت هم ویلي چې د دوی ۱۵۰ سرتیري خوشې شوي دي.
د اوکراین ولسمشر ولادیمیر زلینسکي، ویلي: «موږ هڅه کوو چې له روسیې سره خپل ټول یرغمل شوي راخوشې کړو، زموږ له یاده به یو یرغمل شوی کس هم و نه وځي.»
زلینسکي وایي: «د روسیې له یرغمله زموږ د هر وګړي خوشې کېدل زموږ لپاره ښه خبر او زموږ هیله ده. موږ پر دې بریالي شو، چې ۱۸۹ تنه بېرته له خپلو کورنیو سره یو ځای کړو.»
روسیې او اوکراین تر دې وړاندې هم یو شمېر یرغمل شوي سرتیري پخپلو کې تبادله کړي وو. په وروستي ځل د سپټامبر په نیمایي کې هم دواړو هېوادونو ۲۰۶ تنه بندیان یو بل ته سپارلي وو.
که څه هم چې د دواړو خواو سره د یرغمل شویو کره شمېرې نه دي خپرې شوې، خو اوکرایني چارواکو تر دې وړاندې ویلي وو، چې د دوی سره لږ تر لږه ۶۰۰ روسي سرتیري یرغمل دي.