په سوېلي کوریا کې د الوتکې د لوېدو له امله د مړو شمېر ۴۷ ته لوړ شو
د سوېلي کوريا يونهاپ خبري اژانس ویلي، چې د دغه هېواد په موان هوايي ډګر کې د الوتکې د لوېدو په پېښه کې د مړو شويو کسانو شمېر ۴۷ ته لوړ شو. له دې پېښې وروسته د سوېلي کوریا د ولسمشرۍ دفتر بېړنۍ غونډه رابللې ده.
دغه پېښه وروسته له هغه رامنځته شوه چې یوه بوینګ مساپر وړونکې الوتکه د سوېلي کوریا د موان په نړۍوال هوايي ډګر کې له ځغاستلیکې څخه ووته او له یوه دیوال سره وجنګېده.
په دې الوتکه کې ۱۷۵ مساپر او شپږ عمله سپاره وو.
د سوېلي کوریا د اور وژنې یوه چارواکي ویلي چې د ژغورنې عملیات لا هم روان دي. او ښايي شمېرې نورې لوړې شي.
یوه ویډیو چې د سیمه ییزو رسنیو له خوا خپره شوې ښيي چې دوه انجن لرونکې الوتکه له یوه دیوال سره ټکر کوي.
په ځینو نورو انځورونو لیدل کیږي چې د الوتکې ځینې برخې لوګي او اور نیولې. سوېلي کوریا د اور وژنې ۳۲موټرونه او څو چورلکې د اور وژنې سیمې ته استولي دي.
د الوتنې د څارنې سایټ فلایټرادار ۲۴ وویل چې الوتکه د بوینګ ۸۰۰-۷۳۷ ده.
