روسیې د طالبانو له حکومت او پاکستان د زغم غوښتنه کړې
د روسبې د بهرنیو چارو وزارت ویاندې ماریا زاخارووا ویلي، چې روسیه د افغانستان او پاکستان تر منځ پر ترینګلي وضعیت اندېښمنه ده. هغې وویل، چې روسیه د طالبانو له حکومت او پاکستان څخه د زغم غوښتنه کوي او له دواړو خواوو غواړي چې شته ستونزې د خبرو له لارې حل کړي.
د روسیې د بهرنیو چارو وزارت د اغلې زاخارووا په حواله په خپله پاڼه لیکلي: «روسیه د افغانستان او پاکستان تر منځ د ترینګلتیاوو له ډېرېدو اندېښمنه ده، چې د نښتو له امله نه یوازې پوځیان؛ بلکې ولسي وګړي هم وژل کېږي.»
د روسیې د بهرنیو چارو وزارت ویاندې طالبانو او پاکستان ته سپارښتنه کړې، چې د اختلافاتو د سولهییز حل لپاره دې "رغنده خبرې" وکړي.
تېره ورځ او وړمه شپه پر ډیورنډ کرښه د طالبانو او پاکستاني پوله ساتو تر منځ څو ځایه جګړه شوې چې دواړو لوریو یو بل ته د زیانونو د اوښتو دعوې کړې دي.
دغه ترینګلتیا له هغه وروسته رامنځته شوه چې د تېره اوونۍ پاکستاني جیټ الوتکو د پکتیکا په برمل ولسوالۍ کې څو ځایه هوايي بریدونه وکړل چې د طالبانو حکومت د شمېرو له مخې تر ۵۰ زیات کسان په کې وژل شوي چې ډیری یې ولسي وګړي دي.
