فضلي: له طالبانو سره د جوړ جاړي هڅې د بهرنیانو د شومو پلانونو یوه برخه ده
د افغانستان دجمهوري نظام د چارو ادارې پخواني رئیس فضل محمود فضلي د (مرغومې ۵مه) په تازه څرګندونو کې ویلي، له طالبانو سره د جوړ جاړي هڅې له تېرو درېیو کلونو راهیسې د بهرنیانو په مالي ملاتړ روانې دي او د هغو د شومو پلانونو یوه برخه ده.
ښاغلی فضلي وایي، په دې بهیر کې د تېرو څلورو لسیزو د افغان انجويي فعالان پراخه ونډه لري، چې یوازینۍ موخه یې له بهرنیانو څخه د پروژو ترلاسه کول دي.
د هغه په وینا؛ یو شمېر هېوادونه او سازمانونه هڅه کوي د طالبانو د ملاتړلپاره داسې ښکاره کړي چې د دغې ډلې واک د افغانانو د ملاتړ پر بنسټ دی، په داسې حال کې چې حقیقت بل ډول دی.
هغه زیاتوي: « دغه هڅې د دې لپاره دي چې افغان ولس په خیالي ژمنو دوکه کړای شي او د طالبانو مذهبي افراطي څېره د مصنوعي ښکلا له لارې پټه شي.» خو د فضلي په باور، دا هڅې په بشپړ ډول ناکامې شوې دي او طالبان د افغانانو تر څنګ د نړۍ لپاره هم د تایید وړ نه دي.
فضل محمود فضلي ټینګار کوي چې هیڅ خپلواک افغانه ټولنه د طالبانو سره د جوړ جاړي په بهیر کې ګډون نه لري، ځکه افغانان پوهېږي چې دا ډله د مثبت بدلون وړتیا نه لري او په پرله پسې ډول د پرمختګ مخنیوی کوي.
د هغه په خبره، طالبان د ښځو له زده کړو او د نارینه وو له ازادۍ سره ابدي دوښمني لري.
فضلي په دې باور دی، چې بهرنیان په دې واقعیت پوهېږي چې طالبان نه بدلېږي؛ خو بیا هم د تعامل پروژې تمویلوي چې افغانان د جهل او ناپوهۍ په سیوري کې پاتې شي.
د هغه په وینا، د دې وضعیت د بدلولو لپاره لومړنی ګام د خپلواکو ملي،فکري او سیاسي سازمانونو رامنځته کول او انسجام دی، چې وکولای شي د طالبانو واکمني او بهرنی ملاتړ یې وننګوي.
دغه څرګندونې د طالبانو د واکمنۍ او د هغوی د ملاتړ په اړه د کورنیو او نړیوالو بحثونو په دوام کې شوي دي.
