په یمن کې د حوثیانو پر مرکزونو د اسراییل په بریدونو کې شپږ تنه وژل شوي دي

د سبا خبري اژانس ویلي، چې په یمن کې د حوثیانو تر واک لاندې د صنعا او حدیده په هوایي ډګرونو د اسراییل په بریدونو کې د پنجشنبې په ورځ شپږ تنه وژل شوي او څلویښت نور ټپیان شوي دي.

حوثیانو ویلي چې دوی چمتو دي چې د اسراییل بریدونو ته چټک ځواب ورکړي او د «د کړکېچ زیاتېدو ته به په کړکېچ زیاتېدو» سره ځواب ورکړي.

اسراییل د پنجشنبې په ورځ په یمن کې د صنعا د نړۍوال هوايي ډګر په ګډون د ایران په ملاتړ حوثیانو پورې تړلي څو هدفونه په نښه کړل.

د روغتیا نړۍوال سازمان مشر ټیډروس اډانوم ګیبریوس وویل چې هغه د صنعا په هوایی ډګر کې په الوتکه کې د سپرېدو په حال کې و چې برید وشو.

ټیډروس وویل چې هغه یمن ته تللی ترڅو د ملګرو ملتونو د بندي شويو کارمندانو خوشې کولو په اړه خبرې وکړي او د بشري وضعیت ارزونه وکړي.

د یمن پلازمینه صنعا نړۍوال هوايي ډګر، د حدیده بندر او د حوثیانو د تیلو تاسیسات د دغو بریدونو په هدفونو کې ول.

د اسراییل پوځ په یوه بیان ویلي، چې دغه عملیات د دغه هېواد د پوځ د لوی درستیز، د دفاع وزیر او د دغه هېواد د لومړي وزیر له تایید وروسته ترسره شوي.

د صنعا پر هوايي ډګر او د ایران په ملاتړ د یمن حوثیانو پر مرکزونو له بریدونو څو ساعته وروسته د اسراییل لومړي وزیر بنیامین نتنیاهو له ۱۴ چینل سره په مرکه کې وویل: «له هغوی سره زموږ کار اوس پیل شوی دی.»

په وروستیو ورځو کې د یمن حوثیانو پر اسراییل د توغندیو او ډرون بریدونو ته زور ورکړی دی. ډیری دا توغندي د اسراییل د دفاعي سیسټم لخوا شنډ او له منځه وړل شوي، خویو شمیر نور یې په اسراییل کې په ځینو ځایونو لګېدلي هم دي.