شهباز شریف د بېنظیر بوټو د وژل کېدو په ۱۷م تلین هغه یوه زړوره سیاستواله بللې ده
د پاکستان لومړي وزیر شهباز شریف د دغه هیواد د پخوانۍ لومړۍ وزیرې بېنظیر بوټو د وژل کېدو د ۱۷م تلین د نمانځنې پر مهال هغه په دغه هیواد کې یوه زړوره سیاستواله بللې. شهباز شریف ویلي، هغې د دغه هیواد په سیاسي ډګر کې ستر بدلونونه راوستلي.
د پاکستان لومړنۍ ښځینه لومړۍ وزیره بېنظیر بوټو د ۲۰۰۷ زیږدیز کال د ډیسمبر په ۲۷مه نېټه په راولپنډۍ کې د ټاکنیز کمپاین پر مهال په ډزو ووژل شوه.
هغې په نويېمو کلونو کې دوه ځله د پاکستان د لومړۍ وزیرې په توګه ټاکنې وګټلې او په اسلامي هېوادونو کې هغه مهال لومړنۍ ښځینه واکمنه وګڼل شوه.
د پاکستان لومړي وزیر شهباز شریف د بېنظیر بوټو د وژل کېدو د ۱۷م تلین په مناسبت هغه «د ډیموکراسۍ پلوۍ او د پاکستان په سیاست کې د سترو بدلونونو» راوستونکې بللې ده.
بېنظیر بوټو په ۱۹۵۳ زیږدیز کال کې د پاکستان په کراچۍ ښار کې زیږیدلې وه. د هغې پلار ذوالفقار علي بوټو هم د پاکستان ولسمشر پاتې شوی و ؛خو د یوې پوځي کودتاه په ترڅ یې حکومت ړنګ او بیا په دار وځړول شو.
د بېنظیر بوټو خاوند اصف علي زرداري دا مهال د پاکستان د ولسمشر په توګه دنده ترسره کوي چې په پاکستان کې د سیاسي لوبو لوی لوبغاړی بلل کیږي.
