د خوړو نړۍوال پروګرام: د صنعا پر هوايي ډګر برید یمن کې د بشري مرستو بهیر له ګواښ سره مخ کړ
د ملګرو ملتونو د خوړو نړۍوال پروګرام د یوې خبرپاڼې په خپرولو سره پر صنعا نړۍوال هوايي ډګر د اسراییل د وروستیو بریدونو په اړه ژوره اندېښنه څرګنده کړې. دغو بریدونو د ملګرو ملتونو د بشري مرستو د هوایي خدمتونو (UNHAS) پر عملیاتو منفي اغېزه کړې ده.
په دغو بریدونو کې د خوړو نړۍوال پروګرام د هوایي خدمتونو یو غړی ټپي شوی، چې دا مهال تر درملنې لاندې دی.
دغې ادارې ټینګار کړی چې «بشري عملیات او کارکوونکي باید د جګړې هدف ونه ګرځول شي» او له ټولو ښکېلو خواوو یې غوښتي چې نړۍوال بشري قانون ته درناوی وکړي.
د ملګرو ملتونو د بشري مرستو د هوایي خدمتونو (یواینایچاېایس) په یمن او نړۍ کې د بشري مرستو رسولو لپاره یوه مهمه وسیله بلل کېږي او اړمنو کسانو ته د مرستو په رسولو کېبنستيز رول لري.
دا مهال د دغو خدمتونو پر وړاندې وروستیو محدودویتونو یمن ته د بشري مرستو د رسولو پر فعالیتونو اندیښنې راپورته کړې دي.
یمن د پراخ بشري کړکېچ سره مخ دی او د خوړو نړۍوال پروګرام له ټولو اړخونو غوښتنه کړې چې د بشري عملیاتو او کارکوونکو امنیت یقیني کړي.
دغه راز دوی د جګړې له ښکېلو لوریو غوښتنه کړې چې له هر ډول هغه پوځي اقدام څخه ډډه وکړي چې د بشري مرستو او مرستندویه ادارو مخه نیسي.
