د طالبانو امربالمعروف په یوه اونۍ کې ۲۰ کسان د «اخلاقي فساد» په تور نيولي
د طالبانو د امربالمعروف وزارت وایي، چې د دوی محتسبانو په تېره یوه اونۍ کې ۲۰ کسان د «اخلاقي فساد» په تور نیولي دي. دغه وزارت زياتوي، چې تورن کسان له لومړنیو څېړنو وروسته د طالبانو عدلي او قضايي ارګانونو ته معرفي شوي دي.
د طالبانو د امربالمعروف وزارت د پنجشنبې په ورځ (د مرغومې ۶مه) د یوه غږ په خپرولو سره اعلان کړی، چې د دغه وزارت محتسبانو دغه کسان د تېرې اونۍ په اوږدو کې په دایکندي، پروان، لوګر، تخار، سرپل او کابل ولایتونو کې نیولي دي.
دغه وزارت زیاته کړې، چې په همدې اونۍ کې د دوی محتسبانو په غزني، بلخ او دایکندي ولایتونو کې ۱۰ تنه د جادوګرۍ په تور نیولي دي.
د دوی په وینا، دغو کسانو د «اسلامي شریعت خلاف» جادوګري کوله.
د محتسبانو په خبره، له دغو کسانو څخه ترلاسه شوي اسناد ښيي، چې په يادو ولايتونو کې يې د ډېرو کورنيو ترمنځ اختلافات رامنځته کړي وو.
د طالبانو د امربالمعروف وزارت ویاند سیف خیبر له دې مخکې د مرغومي میاشتې پر لومړۍ نېټه ویلي و، چې دغه وزارت په تېرو دریو کلونو کې د افغانستان په بېلابېلو ولایتونو کې لږ تر لږه ۵۵۰ کسان د جادوګرۍ په تور نیولي دي.
خیبر زیاته کړې: «دغو جادوګرانو د پیسو په بدل کې د کورنیو تر منځ نفاق ته لمن وهله.»
د طالبانو د امربالمعروف وزارت محتسبان په ټولو ولایتونو کې ګرځنده ګزمې کوي، خلک تعقيبوي او د خلکو چلند او کړنې وڅاري.
محتسبان ادعا کوي چې دوی د «اسلامي شریعت» له مخې ټولنه اصلاح کوي.
