خواجه اصف: د تحریک انصاف مشر عمران خان د اسراییل مهره ده

د پاکستان دفاع وزیر خواجه اصف وايي، د ګولډ سمیت عملیاتو ګمارل شوي کسان د عمران خان د ژغورنې کمپاین کوي. د ګولډسمیت عملیاتو اصطلاح جعلي پروپاګند او رواني جګړې ته کارول کیږي.

خواجه اصف د امريکا د نوي منتخب شوي ولسمشر ډونلډ ټرمپ د نوي منتخب شوي نوماند رچرډ ګرينل د خبرو په ځواب کې وویل، چې د تحریک انصاف بنسټګر عمران خان لپاره له لویديځ څخه اواز پورته کوونکو ته بايد دا څرګنده شي چې د پاکستان ولس د خپلو ګټو په ساتنه پوهيږي، او پاکستان زموږ یوازینی لومړیتوب دی.

اصف وويل، هغه عناصر چې د عمران خان د خوشې کولو غوښتنه کوي داسرایيل بشپړ ملاتړ لري، او دا د دې ښکارندوی کوي چې دپي ټي ای بنسټګر عمران خان داسراییل مهره ده او له لارې یې، دوی غواړي چې یوازینی مسلمان اټومي ځواک له منځه یوسي.

د پاکستان مخکېنی لومړی وزیر عمران خان، چې په خپل هېواد کې ګڼ شمېر پلویان لري، اوس په زندان کې دی، پاکستاني چارواکي وايي، نوموړی د فساد په هکله د یوې قضیې پلټنو کې له چارواکو سره د همکارۍ نه کولو له کبله نیول شوی.

په دې قضیه کې پر عمران خان تور دی، چې کله لومړی وزیر و، د سیاسي ملاتړ بدل کې یې ځمکه د رشوت په توګه ترلاسه کړې.

دا قضیه په پاکستان کې د ځمکو پیر او پلور یوه خورا لوی کاروباري ملک ریاض حسین له لوري د پیسو (سپینولو) په تړاو د جرمونو مخنیوي لپاره د بریتانیا ملي ادارې د یوې پلټنې پر شاوخوا راڅرخي.

ویل کېږي، چې ملک ریاض دا ځمکه د القادر ټرسټ په نامه ادارې ته ورکړې وه، چې ملکیت یې د عمران خان دریېمه مېرمن بشرل بي بي لري.

عمران خان بیا دا تورونه ردوي او په وینا یې هغه ځمکه د خیریه چارو لپاره ورکړل شوې وه.