د سوریې نوي حکومت په حمص کې ګرځبندیز ولګاوه
د سوریې دولتي رسنۍ وايي، چې له لاریونونو وروسته پولیسو په حمص کې ګرځبندیز لګولی دی.
د حمص امنیه قومانداني، چې د هیئت تحریرالشام په لاس کې ده، دغه ګرځبندیز د ماښام له شپږ بجو نه د سهار تر اتو بجو پورې لګولی دی.
دغه ګرځبندیز په حمص کې له وسله والو نښتو وروسته لګول شوی.
د سوریې چارواکو د چارشنبې په ورځ اعلان وکړ چې په طرطوس کې یې له پخواني رژیم سره د تړلو کسانو یوه ډله محاصره کړې او ځینې کسان یې وژلي دي.
یو شمېر سرچینو ویلي، چې په طرطوس کې د وسله والو نښتو په پایله کې د سوریې د لنډمهالي حکومت د کورنیو چارو وزارت شپږ تنه غړي وژل شوي دي.
فرانس پرېس د ګرځبندیز خبر د سوریې د رسنیو په حواله ور کړی.
