په پاکستان کې د روان کال د پولیو ۶۵مه پېښه هم ثبت شوه
د پاکستان په بلوچستان کې د پولیو د تازه پېښې په ثبتېدو، په پاکستان کې په روان کال کې د پولیو د مثبتو پېښو شمېر ۶۵ ته لوړ شو.
پاکستاني چارواکي وايي، چې د بلوچستان په قلعه عبدالله ولسوالۍ کې په یوې تازه پېښه کې یو نیم کلن ماشوم په دغې ناروغۍ اخته شوی دی.
له دې سره په بلوچستان صوبه کې د پېښو شمېر ۲۷ ته رسېدلی، چې دا د صوبو په کچه تر ټولو لوړه شمېره ده.
له دغو ۶۵ پېښو له ډلې ۲۷یې په بلوچستان کې، ۱۸ یې په سند کې، ۱۸ نورې په خیبر پښتونخوا کې او یوه، یوه بیا په اسلام اباد او پنجاب کې ثبتې شوې دي.
د پولیو وروستۍ پېښه د پاکستان په سند ایالت کې (د لېندۍ په ۲۹مه) ثبت شوې وه.
دغه پېښه داسې مهال ثبتېږي، چې په پاکستان او افغانستان کې د پولیو واکسینونو کمپاین پیل شوی دی.
د دغه کمپاین له لارې په پاکستان کې ۴۴مېلیونه ماشومانو ته واکسین ورکول کېږي.
تر دې وړاندې د پولیو په برخه کې د پاکستان د لومړي وزیر سلاکارې عایشه رضا فاروق وویل، د هېواد په ۱۴۳ ولسوالیو کې به د پولیو شاوخوا ۴۰۰،۰۰۰ کارکوونکي هر کور ته ورځي چې د پنځو کالو څخه کم عمره ماشومانو ته د پولیو څاڅکي ورکړي.
تر دې دوه میاشتې وړاندې په افغانستان کې د طالبانو د ډلې مشر په دغه کمپاین بندیز لګولی و.
