ملي ټلویزیون په شریعت غږ بدلیږي؛ طالبانو د ټرانسمیټرونو نصبولو پروژه داوطلبۍ ته وړاندې کړې
د طالبانو تر کنټرول لاندې ملي ټلوېزیون پر اېکس د یوه اعلان له لارې په کابل او ولایتونو کې د ملي راډیو او شریعت غږ راډیو لپاره د ترانسمیټرونو د نصبوولو پروژه داوطلبۍ ته وړاندې کړې ده. له دې وړاندې سرچینو افغانستان انټرنشنل ته ویلي، چې طالبان ملي ټلوېزیون په شریعت غږ راډیو بدلوي.
د طالبانو تر کنټرول لاندې ملي ټلوېزیون د دوشنبې په ورځ په کابل او ولایتونو کې د ملي راډیو او شریعت غږ راډیو لپاره د ایف ایم څپو ټرانسمیټرونو د نصبولو په موخه د بندپاس فلټر د چمتو کولو پروژه داوطلبۍ ته وړاندې کړې ده.
بانډپاس فلټرونه په یوه ځانګړې فریکونسي کې سیګنالونو ته د تېرېدو اجازه ور کوي او نور لکه د ټلویزیون سیګنالونه بندوي. په باندپاس سره طالبان کولای شي ټلویزیوني سیسټم له تغییر پرته اېف اېم راډیوګانو ته وکاروي. په دې سره راډیو ته یوازې د غږ په محتوا د ټلویزیون سیګنالونه لېږدول کیږي او انځور او ټلویزیوني محتوا پرځای پاتې کیږي.
په دې پروژه کې په مرکز کابل او ولایتونو کې د راډیو د ایف ایم څپو ټرانسمیټرونو نصبول هم شامل دي.
سرچینو افغانستان انټرنشنل ته وویل چې طالبان هڅه کوي د راډیو پر ایف ایم څپو د نشراتو په پیاوړتیا سره د افغانستان د ملي ټلویزیون تصویري خپرونې بندې کړي او ملي راډیو ټلویزیون او ددغه ټلویزیون ولایتي څانګې په راډیوګانې بدلې کړي.
طالبانو په ولایتونو او مرکز کې د شریعت غږ راډیو لپاره د ټرانسمیټرونو د نصبولو پروژې قراداد داسې مهال داوطلبۍ ته وړاندې کړی، چې دمګړۍ د کندهار، هلمند، ارزګان، زابل او نیمروز په ګډون په ګڼو ولایتونو کې دې ډلې په سیمه ییزو ملي ټلوېزیونونو کې تصویري خپرونو باندې بندیز لګولی دی.
د تلې میاشتې پر ۲۸مه نېټه د طالبانو تر واک لاندې د افغانستان د ملي تلوېزیون ځینو کارکووونکو افغانستان انټرنشنل ته وویل، چې د طالبانو د ملي ټلوېزیون رهبرۍ ناسته کې د ملي ټلوېزیون لپاره د ددې ډلې رییس قاري یوسف احمدي ویلي، چې ملا هبت الله ملي ټلوېزیون بندوي.
قاري یوسف احمدي په دغه ناسته کې ویلي و، چې له کندهار څخه د ملاهبت الله له خوا فشارونه زیات دي، چې په افغانستان کې تصویري رسنۍ وتړل شي، چې په کابل کې به یې پیل له ملي ټلوېزیون څخه وي.
قاري یوسف احمدي په دې جلسه کې ویلي و، چې د ملي ټلویزیون له بندېدو سره به دغه ټلوېزیون په شریعت غږ راډيو بدل شي.
