له واکه تر پرځېدو وروسته د بشارالاسد مېرمنې هم له هغه د جلا کېدو پرېکړه کړې ده
اسما الاسد له خپل خاوند بشارلاسد سره یو ځای د سوریې حکومت تر نسکوریدو وروسته مسکو ته وتښتېده؛ خو اوس هلته له اوسېدو خوښه نه ده. عربي رسنیو راپور ورکړی چې هغې په مسکو کې له خپل خاونده د جلا کېدو پرېکړې کړې او د روسیې له حکومته یې لندن ته د تګ اجازه لیک غوښتی.
د راپورونو له مخې د روسیې حکومتي چارواکي د اسمالاسد پر غوښتنې غور کوي او لا تر اوسه پورې یې ځواب نه دی ورکړی.
اسما دوه تابعیته لري، په لندن کې له سوریایي مور او پلار څخه زېږیدلې ده او د بریټانیا تر څنګ د سوریې تابعیت هم لري.
هغې په ۲۰۰۰ زیږیدیز کال کې سوریې ته کډه وکړه او د ۲۵ کلنۍ په عمر کې یې د سوریې له پخواني واکمن بشارالاسد سره واده وکړ.
د روان زېږدیز کال د ډیسمبر په پیل کې چې د تحریر الشام ډلې په ډراماتیکه توګه د سوریې پلازمېنه دمشق او ځیني لوی ښارونه ونیول اسما الاسد له خپل خاوند مخکې روسیې ته پناه یوړه او بشارالاسد پسې ورغی چې له دې سره پر سوریې د اسد د کورنۍ پنځوس کلنه واکمني هم پای ته ورسیده.
د دې تر څنګ که څه هم روسیې د بشارلاسدد پناه غوښتنه منلې؛ خو هغه تر سختو محدودیتونو لاندې دی او اجازه نه لري چې له مسکو څخه ووځي یا په سیاسي فعالیتونو کې ونډه واخلي.
د اورشلیم پوسټ د راپور له مخې، روسي چارواکي د بشارالاسد شتمنۍ او پیسې، چې ۲۷۰ کیلوګرامه سره زر، ۲ میلیارده ډالره او په مسکو کې ۱۸ اپارتمانونه شامل دي هم کنګل کړي دي.
