د کورمې په اوچت بګن سیمه کې د پاړه چنار دوه ځوانان په ډزو وژل شوي

د خیبرپښتونخوا د کورمې پوليس وايي، چې د دغې ولسوالۍ په اوچت بګن سیمه د پاړه چنار دوه ځوانان چې له هنګو سیمې څخه پاړه چنار ته پر لاره روان وو، د وسله والو له لوري لومړی په ډزو وژل شوي او بیا سرونه ترې غوڅ شوي دي.

په سیمه کې خبریالان وايي، چې دغه پېښه د لارو خلاصولو په اړه تر څو ورځو خبرو وروسته شوې چې ښايي خبرې اترې هم اغېزمنې کړي.

له کورمې څخه خبریال علي افضل افضال افغانستان انټرنشنل پښتو ته نن دوشنبه د (مرغومي درېیمه) وويل چې د اسحاق حسین او وسیم حسین په نوم دغه ځوانان له ډیرې مودې راهیسې په هنګو سیمه کې د لارې بندیدو له پاتې وو، او تېر ماښام یې هڅه کوله چې پاړه چنار ته ولاړ شي چې پر لاره وسله والو نیولي او وژلي یې دي.

داسې هم ویل کیږي چې دغو ځوانانو په سیمه کې نورو کسانو ته يوه اندازه پیسې هم ورکړې وې چې تر پاړه چناره به یې په روغه رسوي.

په هغو انځورونو او ویډیوګانو کې چې له سیمې څخه سرچینو له افغاستان انټرنشنل پښتو سره شریکې کړي ښکاري چې د دوو تنو سرونه له تنې جلا او جسدونه یې په وینو لت پت پراته دي.

د کورمې پولیس تاییدوي چې دغه دوه ځوانان د اوچت بګن په سیمه کې لومړی په ډزو وژل شوي او بیا سررونه ترې پرې شوي دي.

له دوه نیمو میاشتو راهیسي، د پاړه چنارـ پېښور تر منځ لویه لاره په دغې ولسوالۍ کې د مذهبي شخړو له امله تړل شوې ده.

د پاکستاني رسنیو د راپور له مخې، تېره ورځ له سلو ډیر کسان د الوتکې له لارې یوې او بلې خوا لېږدول شوي او ټاکل شوې چې نن دوشنبه به په اوو الوتنو کې کورمې ته د ۶۰ میلیونه رپیو په ارزښت درمل ورسول شي.