انتونیو ګوټرېش: سوریه لا هم د نړۍ یو له سترو بشري ناورینونو سره مخ هیواد دی

د ملګرو ملتونو سرمنشي انتونیو ګوټرېش وایي، چې سوریه په نړۍ کې لاهم یو له سترو بشري ناورینونو سره مخ هیواد دی. هغه سوریې ته په بیړنیو مرستو رسولو ټینګار کړی.

نوموړي پر اېکس پاڼه په سیمه کې د ملګرو ملتونو مرستندویه ادارو د کارکوونکو انځورونو په خپرولو سره کاږلي: «زموږ همکاران د خلکو د اړتیاو ارزولو او لاهم په چټکۍ سره د بدلون وړ شرایطو ته د ځواب ورکولو لپاره کار کوي.»
هغه وړاندې لیکي، چې د بشردوستانه او بیارغونې لپاره کافي ملاتړ خورا مهم دی.
له بل پلوه د ترکیې د بهرنیو چارو وزیر هاکان فیډان دمشق ته له سفر او د سوریې له نویو مشرانو سره تر کتنې وروسته ویلي، چې سوریه ښه راتلونکی لري او دوی یې ترڅنګ ولاړ دي.
هاخوا بیا د تحرير الشام مشر د ترکيې د بهرنيو چارو له وزير سره په يوه خبري غونډه کې پر نړۍوالې ټولنې غږ وکړ، چې پر سوريې بنديزونه لغوه کړي او د دغه هېواد د "پرېکړو د خپلواکۍ" ملاتړ وکړي.
ملګرو ملتونو تر دې وړاندې هم ویلي و، چې د سوریې له خلکو سره د یو داسې هېواد په جوړولو کې مرستې ته ژمن دي، چې په هغه کې پخلاینه، عدالت، ازادي او سوکالي د ټولو لپاره ګډ واقعیتونه اوسي.