په پښتونخوا کې د نا امنیو ډېرېدل؛ ملي جمهوري غورځنګ په سوېلي پښتونخوا کې غونډه جوړوي
په پاکستان کې د ملي جمهوري غورځنګ مشر محسن داوړ په یوه تازه خپاره کړي ویډیوي پېغام کې ویلي چې په راتلوونکو ورځو کې به د سوېلي پښتونخوا په لورالایي سیمه کې د نا امنۍ او جګړې پر ضد غونډه جوړوي، ترڅو پښتونخوا کې د جګړو پر ضد خپل غږ پورته کړي.
د پاکستان د پارلمان پخواني غړي محسن داوړ د پاکستان پر حکومت تور ولګاوه چې د پښتونخواه په خاوره کې د روانې جګړې تر شا د دوی لاس دی او هره ورځ دغلته د ترهګرۍ پېښې رامنځته کېږي.
د پاکستان حکومت لا د محسن داوړ دغو خبرو ته غبرګون نه دی ښودلی.
داوړ له پښتنو غوښتي چې په دې غونډه کې پراخ ګډون وکړي او د ترهګرۍ خلاف غږ پورته کړي.
ښاغلی داوړ زیاتوي: «دا جنګ هسې نه ودریږي، دا یو مسلسل مزاحمت او سیاسي عمل غواړي چې باید د جګړې خلاف وشي.»
تر دې وړاندې د روان میلادي کال د اکټوبر میاشتې پر یوولسمه نېټه د پښتونخواه په خیبر ولسوالۍ کې د پښتنو یوه لویه ولسي جرګه وشوه چې په کې له پاکستاني پوځیانو او طالبانو څخه غوښتنه شوې وه چې تر دوو میاشتو پورې دې د پښتنو له سیمو ووځي؛ خو د دې مودې په پوره کیدو سره لا هم دا پرېکړې نه دي عملي شوي.
په یاده جرګه کې د ترهګرۍ پر ضد د سختو پریکړو سره سره په خیبر پښتونخواه کې د پاکستاني طالبانو بریدونه تر بل هر وخت ډېر شوي دي.
