ټرمپ وايي د امریکا د پوځ یوه لویه برخه تجهیزات افغانستان کې پرېښودل شوي

د امریکا منتخب ولسمشر ډونالډ ټرمپ په فونیکس ښار کې خپلو پلویانو ته په یوه اوږده وینا کې له افغانستان نه د بایډن ادارې د د وتلو پرېکړه په سختو ټکو وغندله او ویې ویل، چې د ده په مشرۍ به د امریکا لپاره "یو زرین دور" پیل شي.هغه ژمنه وکړه چې د پوځ کمزورې شوې برخې به بیا ورغوي.

ټرمپ له افغانستان څخه د وتلو پر مهال د میلیاردونو ډالرو نظامي تجهیزاتو پرېښودل او د ۱۳ امریکایي سرتېرو مړینه یوه ستره ناکامي وبلله. هغه په ځانګړې توګه د هغو ۴۸ سرتېرو یادونه وکړه چې په دې پېښه کې سخت ټپیان شوي وو.

ټرمپ وویل، «۴۸سرتیري ډېر سخت ژوبل شوي دي، د هغوی پښې، لاسونه او مخونه ژوبل شوي او هېڅوک د هغوی په اړه خبرې نه کوي». هغه ټپي شویو سرتېرو ته په خطاب کې وویل، « موږ له تاسې سره مینه لرو، موږ تاسې هېڅکله نه هېروو».

ټرمپ وویل چې د واک په لومړۍ دوره کې یې پوځ داسې یوې کچې ته ورساوه چې مخکې یې ساری نه درلود، خو د هغه په وینا، په افغانستان کې پرېښودل شوي تجهیزات د دې پرمختګ یوه برخه زیانمنه کړه. ټرمپ وویل، « ما ټول پوځ بیا جوړ کړ، په داسې کچه چې مخکې هېڅکله داسې نه و، خو له بده مرغه یوه لویه برخه مو افغانستان ته ورکړه. تاسې باور کوئ؟ څومره بد کار دی!».

هغه زیاته کړه چې کله سپینې ماڼۍ ته لاړ، پوځ په ډېر بد حالت کې و. « یوه جنرال راته وویل، صېب، موږ ډېر کم، تقریباً هېڅ مهمات نه لرو، ما ورته وویل، دا خبره پټه وساته. پرېږده چې دښمن پرې پوه نشي. دا ښه نه ده».

ټرمپ ژمنه وکړه چې د پوځ هغه برخې چې کمزورې شوې دي، بیا به یې په پیاوړي ډول جوړې کړي او ډاډ یې ورکړ چې د امریکا د دفاع وړتیا به په نړۍ کې بې ساري پاتې شي.

هغه وویل چې په اوکراین جګړه او منځني ختیز کې به متحده ایالتونه ځان ښکیل نه کړي.