هبت الله د هغو کسانو دوسیې لغوه کړې چې تېر حکومت کې له طالبانو سره په همکارۍ تورن شوي وو
د طالبانو مشر هبت الله اخوندزاده له سیستم نه د هغو کسانو ددوسیو حذفولو امر کړی، چې له طالبانو سره د همکارۍ له امله د تېر حکومت په قضايي او امنیتي ارګانونو کې ثبت وې. هغه ویلي چې دا کسان تر هغه بې ګناه دي چې د طالبانو د رژیم له خوا په کومه قضیه کې تورن نه وي پېژندل شوي.
د طالبانو مشر هبت الله اخوندزاده د یکشنبې په ورځ په یوه حکم کې امر کړی، چې د دې ډلې د غړو یا هغو کسانو دوسیې، چې د پخوانیو حکومتونو له خوا محاکمه شوي او یا له طالبانو سره د همکارۍ په تور مجرم پېژندل شوي وي، له اداري اسنادو او برېښنايي سیسټمونو څخه په بشپړه توګه لرې شي.
د طالبانو د مشر په حکم کې راغلي چې اړوندې ادارې مکلفې دي، چې له بایومټریک سیسټم، اداري اسنادو، د محکمې له پرېکړو، د څارنې او امنیتي اسنادو، لېستونو او برېښنايي اسنادو څخه د دغو کسانو نومونه او دوسیې لرې او له منځه یوسي.
هبت الله اخوندزاده دا هم ویلي چې دا کسان تر هغه چې د دې ډلې تر واکمنۍ لاندې یې جرم نه وي کړی، بې ګناه ګڼل کېږي.
خو ویل کیږي چې د طالبانو د مشر له حکم سره سم هر ډول اداري اسناد چې د طالبانو د چارواکو له خوښې سره سم نه وي، له منځه وړل کېږي.
طالبانو لا دمخه د خپلو پخوانیو همکارانو د ملاتړ لپاره اقدامات کړي دي.
په تیرو دریو کلونو کې دې ډلې د ځانمرګو بریدګرو کورنیو ته ځانګړي امتیازات ورکړي دي.
