په غزه کې د اسراییل هوایي بریدونو ۱۷ فلسطینیان ووژل
روغتیايي چارواکي وايي چې د غزې په بېلابېلو سیمو کې د اسراییلي پوځ په بریدونو کې ۱۷ تنه فلسطینیان وژل شوي دي. د چارواکو په وینا، د موسی بن نصیر ښوونځي په برید کې د ماشومانو په ګډون ۸ کسان وژل شوي، چې په دغه ښوونځي کې یې استوګنه کوله.
د اسراییل پوځ په یوه اعلامیه کې ویلي چې په دغه برید کې یې د حماس هغه جنګیالي په نښه کړي چې د ښوونځي له دننه یې فعالیت کاوه.
په همدې حال کې په بیت لاهیا کې د کمال عدوان روغتون مشر اعلان وکړ چې د اسراییل پوځ کارکوونکو ته امر کړی چې روغتون خالي کړي او ناروغان او ټپیان بل روغتون ته ولېږدوي.
حسین ابو صفیه وویل دا کار "تقریبا ناشونی" دی ځکه روغتون د ناروغانو لیږدولو لپاره امبولانس نه لري.
د اسراییل پوځ د تېر کال له اکتوبر میاشتې راهیسې د غزې پر بېلابېلو سیمو بریدونه کوي. فلسطینیان پر اسراییل د «نسل وژنې» تور لګوي.
د غزې د روغتیا وزارت وايي، پر غزې د اسراییل په بریدونو کې تر اوسه له ۴۵ زرو ډېر کسان وژل شوي دي.
د جګړې له پیل راهسې حماس ډلې هم ادعا کړې ده، چې په بېلابیلو کمینونو کې یې اسراییلي ځواکونو ته درنده مرګ ژوبله اړولې ده.
له ډېرو هڅو سره بیا هم تر دې دمه قطر او مصر په دې نه دي توانیدلي چې د حماس وسله والې ډلې او اسراییل تر منځ اوربند ته لاره هواره کړي.
